రూ.2 కోట్లు చెల్లించాలి: పరువు నష్టం కేసులో తరుణ్ తేజ్‌పాల్‌కు ఎదురుదెబ్బ

దిల్లీ: పరువు నష్టం కేసులో తెహల్కా(Tehelka) పత్రిక మాజీ ఎడిటర్‌ ఇన్‌ చీఫ్ తరుణ్‌ తేజ్‌పాల్‌(Tarun Tejpal)కు కోర్టులో ఎదురుదెబ్బ తగిలింది. ఈ కేసులో తెహల్కా పత్రిక, తరుణ్ తేజ్‌పాల్‌తో పాటు మరో ఇద్దరు పాత్రికేయులు రెండు కోట్ల రూపాయలు చెల్లించాలంటూ దిల్లీ హైకోర్టు(Delhi High Court) ఆదేశించింది. 2002లో మేజర్ జనరల్‌ ఎంఎస్‌ అహ్లూవాలియా ఈ పరువు నష్టం కేసు వేశారు.

రక్షణరంగానికి సంబంధించి కొనుగోలు ఒప్పందాల్లో అహ్లూవాలియా మధ్యవర్తిగా వ్యవహరించి అవినీతికి పాల్పడ్డారంటూ 2001లో తెహల్కా పత్రిక ఓ కథనాన్ని ప్రచురించింది. ఈ కేసుకు సంబంధించి వాదనలు విన్న కోర్టు.. రూ. రెండు కోట్లు చెల్లించాలని ఆదేశించింది. అలాగే ఈ తీవ్రస్థాయి అవినీతి ఆరోపణలతో అహ్లూవాలియా ప్రతిష్ఠ దారుణంగా దెబ్బతిన్నదని వ్యాఖ్యానించింది. ఆయనపై వచ్చిన వార్తలు తప్పని తేలినప్పటికీ.. ఆయన అనుభవించిన వేదనను మాత్రం నయం చేయలేవంటూ పేర్కొంది.