US: ఒకేరోజు మూడు చోట్ల కాల్పులు.. నలుగురి మృతి

వాషింగ్టన్‌: అమెరికాలో మరోసారి కాల్పుల మోతమోగింది. ఒకే రోజు మూడు ప్రాంతాల్లో కాల్పులు చోటుచేసుకోగా నలుగురు మృతిచెందారు. మరో ఏడుగురు గాయపడ్డారు. మేరీల్యాండ్‌లో శనివారం కాల్పుల కలకలం రేగింది. ఈ ఘటనలో నలుగురు మరణించారు. మరొకరికి గాయాలైనట్లు అధికారులు తెలిపారు. కాల్పులకు తెగబడినట్లుగా భావించిన అనుమానితుడిని పోలీసులు అక్కడిక్కడే కాల్చిచంపినట్లు తెలుస్తోంది. నిందితుడు కాల్పులు జరపడానికి కారణాలు తెలియరాలేదు.

దక్షిణ ఫ్లోరిడాలోని ఓ మాల్‌లో రెండు సమూహాల మధ్య గొడవ కాల్పులకు దారి తీసింది. శనివారం మధ్యాహ్నం జరిగిన ఈ ఘటనలో ముగ్గురు గాయపడ్డారు. న్యూయార్క్‌లోని టైమ్స్ స్క్వేర్‌లోనూ శనివారం మధ్యాహ్నం కాల్పులు జరిగాయి. ఈ ఘటనలో నాలుగేళ్ల చిన్నారి సహా ముగ్గురిపై దుండగులు కాల్పులు జరిపి పారిపోయారు. వారికోసం గాలిస్తున్నట్లు అధికారులు పేర్కొన్నారు.