Collector: పని చేయలేకపోయా.. జీతం వద్దన్న కలెక్టర్‌

‘ప్రజా ఫిర్యాదులను పరిష్కరించలేకపోయా.. నాకు అందాల్సిన డిసెంబరు నెల జీతాన్ని నిలిపివేయండి’ అంటూ ఓ జిల్లా కలెక్టరు అధికారులను ఆదేశించారు. సీఎం హెల్ప్‌లైనుకు అందిన ఫిర్యాదులు వంద రోజులు దాటినా ఇంకా అపరిష్కృతంగానే ఉన్నందున ఇతర అధికారుల వేతనాన్ని కూడా ఆపాలని జిల్లా కోశాధికారికి సూచించారు. మధ్యప్రదేశ్‌ రాష్ట్రంలోని జబల్‌పుర్‌ జిల్లా కలెక్టరు కరంవీర్‌ శర్మ ఈ నిర్ణయం తీసుకున్నారు. సోమవారం.. శాఖలవారీగా జరిగిన సమీక్షలో ఈ సంఘటన చోటుచేసుకుంది. రెవెన్యూ కేసుల విషయంలో నిర్లక్ష్యంగా ఉన్నందుకు తహశీల్దార్ల ఇంక్రిమెంట్లను కూడా ఆపాలని ఆదేశించారు. సమీక్షకు హాజరుకాని జిల్లా మార్కెటింగ్‌ అధికారికి షోకాజ్‌ నోటీసు పంపించారు.