Chandrayaan 4: చంద్రయాన్‌-4 కోసం ఇస్రో కసరత్తు

పుణె: చంద్రయాన్‌-3 అందించిన విజయంతో జాబిల్లిపైకి తదుపరి ప్రయోగం కోసం భారత అంతరిక్ష సంస్థ (ఇస్రో) రంగం సిద్ధం చేస్తోంది. చంద్రయాన్‌-4/లూపెక్స్‌ పేరుతో చేపట్టే ఈ ప్రయోగంలో భాగంగా చందమామ నుంచి రాళ్లు, మట్టి నమూనాలను భూమి మీదకు తీసుకురావాలని భావిస్తోంది. ఈ ప్రాజెక్టు గురించి ఇస్రోకు చెందిన ‘స్పేస్‌ అప్లికేషన్స్‌ సెంటర్‌’ డైరెక్టర్‌ నీల్‌ దేశాయ్‌ పుణెలో వివరించారు. ‘‘చంద్రుడి ఉపరితలంపై లూనార్‌ పోలార్‌ ఎక్స్‌ప్లోరేషన్‌ మిషన్‌ (లూపెక్స్‌)ను సిద్ధం చేస్తున్నాం. చంద్రయాన్‌-3లోని ల్యాండర్‌.. చంద్రుడి దక్షిణ ధ్రువంపై సుమారు 70 డిగ్రీల దక్షిణ అక్షాంశం వద్ద దిగింది. చంద్రయాన్‌-4లో 90 డిగ్రీల దక్షిణ అక్షాంశం వద్ద ల్యాండర్‌ దిగుతుంది. ఇందులో 350 కిలోల బరువున్న రోవర్‌ను (చంద్రయాన్‌-3లో రోవర్‌ బరువు 30 కిలోలు) పంపనున్నాం. ఇది కిలోమీటరు మేర చంద్రుడిపై తిరుగుతుంది. చంద్రయాన్‌-3 మిషన్‌ జీవిత 14 రోజులు కాగా.. చంద్రయాన్‌-4 సుమారు వంద రోజులు పనిచేస్తుంది. ఈ సమయంలో రోవర్‌లోని పరికరాలు చంద్రుడిపై రాళ్లు, మట్టి నమూనాలను సేకరించి భూమి మీదకు తీసుకొస్తాయి. ఈ ప్రాజక్టు కోసం రెండు వాహకనౌకలను సిద్ధం చేయాల్సి ఉంటుంది. ఇందుకు ఐదు నుంచి పదేళ్ల సమయం పడుతుంది’’ అని నీల్‌ దేశాయ్‌ వెల్లడించారు. దీని నిమిత్తం జపాన్‌ అంతరిక్ష సంస్థతో కలిసి ఇస్రో పనిచేస్తోందని చెప్పారు.