Hijab Row: ‘హిజాబ్‌’ వివాదంపై నీతీశ్ కుమార్‌ కీలక వ్యాఖ్యలు

పట్నా: కర్ణాటకలో తీవ్ర రాజకీయ దుమారానికి కారణమైన ‘హిజాబ్‌’ వ్యవహారంపై బిహార్‌ ముఖ్యమంత్రి నీతీశ్ కుమార్‌ స్పందించారు. ప్రజల మతపరమైన మనోభావాల్ని తమ రాష్ట్రంలో గౌరవిస్తామని, బిహార్‌లో అసలు ఇదొక సమస్యే కాదన్నారు. తరగతి గదుల్లో విద్యార్థినులు హిజాబ్‌ను ధరిస్తే దానిపై అసలు కామెంట్‌ చేయాల్సిన అవసరమే లేదని అభిప్రాయపడ్డారు. బిహార్‌లో ఇదొక సమస్యే కాదన్న ఆయన.. తాము ఇలాంటివి పట్టించుకోబోమన్నారు. ఇదంతా పనికిరాని వ్యవహారమని వ్యాఖ్యానించారు. 

పట్నాలో ప్రజా దర్బార్‌ సందర్భంగా విలేకర్లతో మాట్లాడిన నీతీశ్‌ ‘‘బిహార్‌ పాఠశాలల్లో పిల్లలంతా దాదాపు ఒకేరకమైన దుస్తుల్ని ధరిస్తారు. ఎవరైనా తలపై ఏదైనా పెట్టుకుంటే దానిపై మాట్లాడాల్సిన అవసరం లేదు. అలాంటి వ్యవహారాల్లో మేం జోక్యం చేసుకోం. ఒకరి మతపరమైన సెంటిమెంట్లను మేం గౌరవిస్తాం. రాష్ట్ర ప్రభుత్వానికి అందరూ సమానమే’’ అన్నారు. భాజపా పాలిత రాష్ట్రమైన కర్ణాటకలోని ఉడిపిలో హిజాబ్‌ ధరించిన విద్యార్థునుల్ని కళాశాల్లోకి అనుమతి నిరాకరించడం తీవ్ర వివాదానికి దారితీసిన విషయం తెలిసిందే.