IN-SPAce: అంతరిక్ష రంగంలో భారత్‌ జోరు.. 14 నెలల్లో 30 ప్రయోగాలకు సిద్ధం!

బెంగళూరు: రోదసి రంగంలో మరిన్ని విజయాల నమోదుకు భారత్‌ సిద్ధమవుతోంది. వచ్చే 14 నెలల్లో సుమారు 30 ప్రయోగాలు జరుగుతాయని అంతరిక్ష నియంత్రణ సంస్థ ‘ఇన్-స్పేస్‌ (IN-SPAce)’ వెల్లడించింది. ఇందులో ప్రతిష్ఠాత్మక ‘గగన్‌యాన్‌’ (Gaganyaan)కు సంబంధించిన ఏడు పరీక్షలతోపాటు స్కైరూట్, అగ్నికుల్ వంటి ప్రైవేటు అంకుర సంస్థలకు చెందినవి ఏడు మిషన్లు ఉన్నట్లు తెలిపింది. ప్రస్తుత ఆర్థిక సంవత్సరం (2023-24) నాల్గో త్రైమాసికంలో ఇప్పటికే ఒక ప్రయోగం చేపట్టగా.. మరో మూడు సిద్ధంగా ఉన్నాయి. 2024-25లో మిగతావి నిర్వహించనున్నారు. వాటి తేదీలను ప్రకటించాల్సి ఉంది.

ఎక్స్‌పోశాట్‌ ప్రయోగం విజయవంతం

వాతావరణ అంచనా, విపత్తు నిర్వహణ సంబంధిత సేవల కోసం రూపొందించిన ‘ఇన్‌శాట్‌-3డీఎస్‌’ ఉపగ్రహాన్ని కక్ష్యలో ప్రవేశపెట్టేందుకుగానూ ‘జీఎస్‌ఎల్‌వీ- ఎఫ్‌14’ ప్రయోగాన్ని ఇస్రో త్వరలో చేపట్టనుంది. మార్చిలో ‘ఎస్‌ఎస్‌ఎల్‌వీ డీ3’.. మూడు పేలోడ్‌లను మోసుకెళ్లనుంది. ‘పీఎస్‌ఎల్‌వీ సీ-58’ జనవరిలోనే దూసుకెళ్లింది. చెన్నైకి చెందిన ‘అగ్నికుల్ కాస్మోస్’ తన మొదటి 3డీ ప్రింటెడ్ రాకెట్ ‘అగ్నిబాణ్‌- సార్టెడ్‌ (Agnibaan-SOrTeD)’ ప్రయోగానికి సిద్ధమైంది.

• 2024-25 ఆర్థిక సంవత్సరంలో ఇస్రో..  పీఎస్‌ఎల్‌వీ, జీఎస్‌ఎల్‌వీ రాకెట్ల సాయంతో మూడు చొప్పున, గగన్‌యాన్ మిషన్‌కు సంబంధించి ఏడు పరీక్షలు చేపట్టనుంది.
• ఇస్రో వాణిజ్య విభాగమైన ‘న్యూస్పేస్ ఇండియా లిమిటెడ్’.. నాలుగు పీఎస్‌ఎల్‌వీ, రెండు ఎస్‌ఎస్‌ఎల్‌వీ, ఒక ఎల్‌వీఎం-3 మిషన్ నిర్వహించాలని భావిస్తోంది.
• స్కైరూట్‌ ఏరోస్పేస్ తన ‘విక్రమ్-1’ రాకెట్‌ ద్వారా నాలుగు మిషన్లు నిర్వహించేందుకు సిద్ధమవుతోంది. అగ్నికుల్‌ మరో రెండు ‘అగ్నిబాణ్‌’లను నింగిలోకి పంపనుంది.
• దిగంతరా రీసెర్చ్ అండ్‌ టెక్నాలజీ, ధ్రువస్పేస్, స్పేస్ కిడ్జ్ ఇండియా వంటి కొన్ని స్టార్టప్‌లు, ఐఐటీ-మద్రాస్, మణిపాల్ ఇన్‌స్టిట్యూట్ ఆఫ్ టెక్నాలజీ, సీవీ రామన్ గ్లోబల్ యూనివర్శిటీ (ఒడిశా) తదితర విద్యాసంస్థలూ ప్రయోగాలకు సిద్ధమవుతున్నాయి.