Rahul Gandhi: తెలంగాణ వంటకాల్లో కాస్త ఘాటు ఎక్కువే: రాహుల్‌ ఆసక్తికర ఇంటర్వ్యూ

దిల్లీ: తెలంగాణ వంటకాల్లో కాస్త కారం ఎక్కువే అంటున్నారు కాంగ్రెస్‌ అగ్రనేత రాహుల్‌ గాంధీ (Rahul Gandhi). ‘భారత్‌ జోడో యాత్ర’లో బిజీగా ఉన్న ఆయన.. మధ్యలో ఫుడ్‌ అండ్‌ ట్రావెల్‌ ఛానల్‌ ‘కర్లీ టేల్స్‌’కు ఇంటర్వ్యూ ఇచ్చారు. ఇందులో తన వ్యక్తిగతానికి సంబంధించి ఆసక్తికర విషయాలను పంచుకున్న రాహుల్‌.. తన ఆహార అలవాట్లను బయటపెట్టారు. అలాగే తన పెళ్లి గురించి కూడా సరదాగా మాట్లాడారు.

జోడో యాత్ర (Bharat Jodo Yatra) రాజస్థాన్‌లో ఉన్న సమయంలో రాహుల్‌.. కర్లీ టేల్స్‌ ప్రతినిధి కామియా జానీతో ఫన్‌ చాట్‌ చేశారు. ఈ ఇంటర్వ్యూను కాంగ్రెస్‌ పార్టీ తాజాగా సోషల్‌మీడియాలో పోస్టు చేసింది. ఈ వీడియోలో ఆహార అలవాట్ల గురించి కామియా అడగ్గా ఆయన స్పందిస్తూ.. ‘‘సాధారణంగా ఇంట్లో ఉంటే డైట్‌ విషయంలో చాలా కచ్చితంగా ఉంటా. కానీ జోడో యాత్రలో అన్నీ అందుబాటులో ఉండవు కదా. అయితే భోజనం గురించి నేను పెద్దగా పట్టించుకోను. ఏది అందుబాటులో ఉంటే అది తినేస్తా. కానీ, బఠాణీ, పనసపండు మాత్రం అస్సలు నచ్చవు. ఇక యాత్రలో భాగంగా ఎన్నో రాష్ట్రాల వంటకాలు రుచిచూశాను. సంప్రదాయాల్లాగే ఆహారంలో చాలా వ్యత్యాసాలున్నాయి. అయితే తెలంగాణ వంటకాలు నాకు కాస్త ఘాటుగా అనిపించాయి. అక్కడ కారం కాస్త ఎక్కువ. అంత నేను తినలేను. ఇక నేను నాన్‌ వెజిటేరియనే. చికెన్‌, మటన్‌, సీఫుడ్‌ అన్నీ తినేస్తా. చికెన్‌ టిక్కా, సీఖ్‌ కబాబ్‌, ఆమ్లెట్‌ నా ఫేవరెట్. వీటన్నింటితో పాటు రోజు ఉదయం ఓ కప్పు కాఫీ నోట్లో పడాల్సిందే’’ అని రాహుల్ చెప్పారు.

‘పెళ్లి’ మాట..

ఈ సందర్భంగా పెళ్లి (Marriage) ప్రస్తావన తీసుకురాగా.. సరైన అమ్మాయి దొరికితే తప్పకుండా చేసుకుంటానని రాహుల్‌ తెలిపారు. ‘‘పెళ్లికి నేను వ్యతిరేకం కాదు. అయితే ఒక సమస్య ఏంటంటే.. మా అమ్మానాన్నలది ప్రేమ వివాహం. వారు ఎంతో అన్యోన్యంగా ఉండేవారు. అందువల్ల నా అంచనాలు కాస్త పైనే ఉంటాయి. అయితే, సరైన అమ్మాయి వస్తే తప్పకుండా వివాహం చేసుకుంటా. ప్రేమించే వ్యక్తి, తెలివైన అమ్మాయి అయితే చాలు’’ అని ఆయన వెల్లడించారు.

తొలి జీతం అదే..

కుటుంబ పరిస్థితుల దృష్ట్యా తాను ఇంట్లోనే చదువుకోవాల్సి వచ్చిందని రాహుల్‌ తెలిపారు. ‘‘నానమ్మ చనిపోయిన తర్వాత నన్ను బోర్డింగ్‌ స్కూల్‌ నుంచి తీసుకొచ్చారు. ఆ తర్వాత ఇంట్లోనే చదువుకున్నా. ఉన్నత విద్య కోసం హార్వర్డ్‌కు వెళ్లా. నాన్న హత్య తర్వాత అక్కడి నుంచి నన్ను ఫ్లోరిడాకు పంపించారు. చదువు పూర్తయ్యాక లండన్‌లో ఓ కన్సల్టెన్సీ కంపెనీలో ఉద్యోగం చేశాను. నా తొలి జీతం 2500-3000 పౌండ్లు’’ అని ఆయన చెప్పారు.