Semiconductor: దేశంలో సెమీకండక్టర్‌ చిప్‌ల రూపకల్పన ప్రాజెక్ట్‌కు కేబినెట్‌ ఆమోదం

దిల్లీ: దేశంలో సెమీ కండక్టర్‌ చిప్‌ల రూపకల్పన, తయారీకి సంబంధించిన ప్రాజెక్ట్‌కు కేంద్ర కేబినెట్‌ ఆమోదం తెలిపింది. ఈ ప్రాజెక్ట్‌కు సంబంధించిన వివరాలను సమాచార, ప్రసార శాఖ మంత్రి అనురాగ్‌ ఠాకూర్‌ వెల్లడించారు. ఈ ప్రతిష్టాత్మక ప్రాజెక్ట్‌కు కేంద్ర కేబినెట్‌ రూ.76వేల కోట్లు కేటాయించిందని పేర్కొన్నారు. దీనికి ‘డెవలప్‌మెంట్‌ ఆఫ్‌ సెమీకండక్టర్స్‌ అండ్‌ డిస్‌ప్లే మాన్యుఫ్యాక్చరింగ్‌ ఎకో సిస్టమ్‌’ అని నామకరణం చేసినట్లు తెలిపారు. ఆరేళ్ల కాల వ్యవధిలో మొత్తం నిధులు ప్రాజెక్టుకు ఖర్చు చేయనున్నట్లు వెల్లడించారు. ఈ ప్రాజెక్టు వివిధ రంగాలపై కీలక ప్రభావం చూపుతుందని, అంతర్జాతీయంగా ఆర్థిక వృద్ధి ఏకీకరణకు దోహదపడుతుందని అన్నారు. 2025 నాటికి యునైటెడ్‌ స్టేట్స్ డాలర్స్ (యూఎస్‌డీ)లో ఐదు ట్రిలియన్‌ డాలర్‌ల ఆర్థిక వ్యవస్థకు, 5 ట్రిలియన్‌ డాలర్ల జీడీపీసాధించడంలోనూ గణనీయంగా దోహదం చేస్తుందన్నారు. అంతేకాకుండా యూపీఐ, రూపే డెబిట్‌ కార్డులను ఉపయోగించి జరిపే డిజిటల్‌ లావాదేవీలపై కేంద్రం రూ.1,300కోట్ల రీఎంబర్స్‌మెంట్‌కు కూడా కేంద్రం ఆమోద ముద్రవేసిందని ఠాకూర్‌ తెలిపారు.