Bichagadu 2: ‘బిచ్చగాడు’ సినిమాకి మహేశ్‌బాబు సెట్‌ అవుతారు: విజయ్‌ ఆంటోనీ

ఇంటర్నెట్‌ డెస్క్: స్వీయ దర్శకత్వంలో విజయ్‌ ఆంటోనీ (Vijay Antony) హీరోగా నటించిన చిత్రం.. ‘బిచ్చగాడు 2’ (Bichagadu 2). మే 19న ఈ సినిమా విడుదలకాబోతుంది. ఈ నేపథ్యంలో హైదరాబాద్‌లో ఇటీవల నిర్వహించిన ఓ ఈవెంట్‌లో ఆయన పాల్గొన్నారు. సోషల్‌ మీడియా ఇన్‌ఫ్లూయెన్సర్స్‌, మీమర్స్‌ అడిగిన పలు ప్రశ్నలకు సమాధానమిచ్చారు. ‘ఒకవేళ బిచ్చగాడు సిరీస్‌ చిత్రాల్లో మీరు నటించకపోయి ఉంటే.. మీ స్థానంలో ఏ హీరో అయితే బాగుంటారని భావిస్తున్నారు?’ అని ఒకరు అడగ్గా ఆయన మహేశ్‌బాబు (Mahesh Babu) పేరుని ప్రస్తావించారు. ‘బిచ్చగాడు’ పాత్ర హావభావాలను మహేశ్‌ అద్భుతంగా పలికించగలరని అభిప్రాయపడ్డారు. తమిళ్‌లో అయితే ఆ చిత్రానికి విజయ్‌గానీ అజిత్‌గానీ సూట్‌ అవుతారని చెప్పారు. ఈసారి నేరుగా తెలుగులో సినిమా చేయబోతున్నానని, సంబంధిత వివరాలు త్వరలో ప్రకటిస్తానని తెలిపారు. తాను నటించిన ఐదు సినిమాలు విడుదలకు సిద్ధమవుతున్నాయన్నారు. 

‘బిచ్చగాడు 2’ గురించి మాట్లాడుతూ.. ఈ సినిమా కథకు, 2016లో విడుదలైన ‘బిచ్చగాడు’ కథకు సంబంధం ఉండదని, హీరో పాత్ర బిచ్చగాడు కావడంతో కొత్త సినిమాకి ‘బిచ్చగాడు 2’ పెట్టామని తెలిపారు. వ్యక్తిగతంగా తాను సెన్సిటివ్‌ అని, అందుకే సెంటిమెంట్‌కు ప్రాధాన్యత ఉన్న కథలు రాస్తుంటానని అన్నారు. దర్శకుడి కోణం నుంచి చూస్తే తాను గొప్ప నటుణ్ని కాదని పేర్కొన్నారు. సినిమాకు సంబంధించిన 24 విభాగాల్లో ఎడిటింగ్‌ చాలా కష్టమైందని, అదే ప్రధానమైందని పేర్కొన్నారు. మీమర్స్‌ను ఉద్దేశించి మాట్లాడుతూ.. సినిమా ప్రమోషన్స్‌ చేసే విధానాన్నే వారు మార్చారని, సినిమాకి మించిన వినోదాన్ని పంచుతున్నారని ప్రశంసించారు. సమాచారాన్ని అందిస్తున్నారని కొనియాడారు. సోషల్‌ మీడియా లేకపోయి ఉంటే తన జీవితం బోరింగ్‌గా ఉండేదన్నారు.

తల్లీకొడుకుల అనుబంధం నేపథ్యంలో రూపొందిన ‘బిచ్చగాడు’ ఘన విజయం అందుకున్న సంగతి తెలిసిందే. ‘బిచ్చగాడు 2’.. దానికి సీక్వెల్‌ కాదని స్పష్టం చేసిన విజయ్‌ ఆంటోనీ ఇందులో అన్నా చెల్లెళ్ల సెంటిమెంట్‌ ఉంటుందని వెల్లడించారు. ఈ సినిమాలో హీరో విజయ్‌ గురుమూర్తి పాత్రలో.. భారత్‌లో 7వ అత్యంత సంపన్నుడిగా కనిపించారు. విజయ్‌ సరసన హీరోయిన్‌ కావ్యా థాపర్‌ నటించారు.