Radhe Shyam: ‘రాధేశ్యామ్‌’.. పాటలోనే సినిమా చూపించారు..!

ఇంటర్నెట్‌ డెస్క్‌: చాలాకాలం తర్వాత ప్రభాస్‌(Prabhas) నటించిన పూర్తిస్థాయి ప్రేమకథా చిత్రం కావడంతో ‘రాధేశ్యామ్‌’(Radhe syam)పై సినీ ప్రియుల్లో భారీ అంచనాలు నెలకొన్నాయి. ఈ పీరియాడికల్‌ పాన్‌ ఇండియా సినిమాలో ప్రభాస్‌, పూజా హెగ్డే జోడీ ఎలా ఉంటుందోనన్న ఆసక్తి రోజురోజుకూ పెరుగుతోంది. ఈ క్రేజీ ప్రాజెక్టు ఎలా ఉండబోతుందో తాజాగా విడుదలైన ‘ఈ రాతలే’ అనే వీడియో సాంగ్‌ రుచి చూపించింది. ఇందులో.. ప్రభాస్, పూజా పెయిర్‌ చూడముచ్చటగా ఉంది. ముఖ్యంగా ప్రభాస్‌ లవర్‌బాయ్‌ లుక్‌లో అందరినీ ఆకట్టుకునేలా ఉన్నారు. అందమైన లొకేషన్లలో ఈ సినిమాను ఎంత అద్భుతంగా తెరకెక్కించారో ఈ వీడియో చూస్తే అర్థమవుతోంది. కృష్ణకాంత్‌ రచించిన ఈ గీతాన్ని యువన్‌ శంకర్‌రాజా, హరిణి ఇవటూరి ఆలపించగా జస్టిన్‌ ప్రభాకరన్‌ స్వరాలందించారు.

రాధాకృష్ణ కుమార్‌ దర్శకత్వం వహించిన ఈ సినిమాలో ప్రముఖ నటులు కృష్ణంరాజు, భాగ్యశ్రీ, సచిన్‌ ఖేడ్‌కర్‌, కునాల్‌రాయ్‌ కపూర్‌ తదితరులు కీలక పాత్రలు పోషించారు. యువీ క్రియేషన్స్‌, గోపీకృష్ణ మూవీస్‌ సంస్థలు సంయుక్తంగా నిర్మించిన ఈ సినిమా మార్చి 11న విడుదలకానుంది.