Emergency: కంగనా రనౌత్‌ ‘ఎమర్జెన్సీ’.. రిలీజ్‌ డేట్‌ ఫిక్స్‌.. ఎప్పుడంటే?

ఇంటర్నెట్‌ డెస్క్‌: బాలీవుడ్‌ కథానాయిక కంగనా రనౌత్‌ (Kangana Ranaut) నటించిన తాజా చిత్రం ‘ఎమర్జెన్సీ’ (Emergency). ఈ సినిమా కొత్త విడుదల తేదీ తాజాగా ఖరారైనట్లు కంగనా సోషల్‌ మీడియా ద్వారా ప్రకటించారు. ‘‘ఇండియా చీకటి రోజుల వెనక స్టోరీని చూడండి. జూన్ 14న ‘ఎమర్జెన్సీ’ రిలీజ్‌ అవుతుంది.  ఎమర్జెన్సీ నాకు చాలా ప్రతిష్ఠాత్మక ప్రాజెక్ట్. ‘మణికర్ణిక’ తర్వాత నేను డైరెక్ట్ చేసిన రెండో సినిమా ఇది. ఈ పెద్ద ప్రాజెక్ట్ కోసం జాతీయ, అంతర్జాతీయ స్థాయిలో ప్రతిభావంతులు పని చేశారు. ఇదొక పీరియాడిక్‌ డ్రామా’’ అని కంగనా తెలిపారు. గతేడాది నవంబరు 24న విడుదల కావాల్సిన ఈ సినిమా అనివార్య కారణాల వల్ల వాయిదా పడిన సంగతి తెలిసిందే.  గత కొంతకాలంగా విజయానికి దూరంగా ఉన్న కంగనా ఈ చిత్రం పైనే ఆశలు పెట్టుకున్నారు. ఇంతకుముందు ఓ సందర్భంలో ఈ సినిమా గురించి కంగనా మాట్లాడుతూ.. తనకు సంబంధించిన ఆస్తులన్నింటినీ దీని కోసం తనఖా పెట్టినట్లు చెప్పారు. మొదటి షెడ్యూల్ సమయంలో డెంగీ బారినపడి రక్తకణాల సంఖ్య భారీగా పడిపోయినా షూట్‌లో పాల్గొనాల్సి వచ్చిందన్నారు.

రివ్యూ: మోహన్‌లాన్‌ నటించిన మలయాళ బ్లాక్‌బస్టర్‌ ‘నెరు’ ఎలా ఉంది?

మాజీ ప్రధాని ఇందిరాగాంధీ జీవితం ఆధారంగా ఈ సినిమాని తెరకెక్కించారు. ఈ సినిమాకు దర్శకత్వం వహిస్తూ నిర్మాతగానూ వ్యవహరించిన కంగనా ఇందిరాగాంధీ పాత్రలో నటించారు. జయప్రకాష్‌ నారాయణ్‌ పాత్రలో అనుపమ్‌ ఖేర్‌, మాజీ ప్రధాని అటల్‌ బిహారీ వాజ్‌పేయీ పాత్రలో శ్రేయస్ తల్పడే కనిపించనున్నారు.