సినిమా చూసి అడ్వాన్స్‌ ఇచ్చిన నిర్మాత

తన బ్యానర్‌లో ఓ సినిమా..

హైదరాబాద్‌: ఓ విభిన్న ప్రేమకథా చిత్రంగా తెరకెక్కి.. త్వరలో ప్రేక్షకుల ముందుకు రానున్న చిత్రం ‘పలాస 1978’. కరుణ కుమార్‌ దర్శకత్వం వహించిన ఈ గ్రామీణ ప్రేమకథా చిత్రంలో రక్షిత్‌, నక్షత్ర ప్రధాన పాత్రల్లో నటించగా రఘు కుంచె ప్రతినాయకుడి పాత్రలో కనిపించనున్నారు. మార్చి 6వ తేదీన ఈ సినిమా ప్రేక్షకుల ముందుకు రానున్న నేపథ్యంలో తాజాగా ‘పలాస 1978’ వీక్షించిన అల్లు అరవింద్‌.. చిత్ర దర్శకుడు కరుణకుమార్‌ను ప్రశంసించారు. 

‘పలాస 1978’ చిత్రం తనకు ఎంతగానో నచ్చడంతో దర్శకుడు కరుణకుమార్‌తో ఓ సినిమా చేసేందుకు ఒప్పందం చేసుకున్నారు. దీంతో అల్లు అరవింద్‌.. అడ్వాన్స్‌ చెక్‌ను కరుణకుమార్‌కు అందించారు. ఈ మేరకు కరుణకుమార్‌ గీతాఆర్ట్స్‌ బ్యానర్‌పై ఓ చిత్రాన్ని తెరకెక్కించనున్నారు. దీనికి సంబంధించిన ఫొటోలను పలువురు సినీవిశ్లేషకులు సోషల్‌మీడియా వేదికగా అభిమానులతో పంచుకున్నారు.