జోనర్‌ చెప్పు.. స్పెషల్‌ గిఫ్ట్‌ పట్టు..!

ట్వీట్‌ చేసిన దర్శకుడు

హైదరాబాద్‌: తాను దర్శకత్వం వహించనున్న కొత్త సినిమా ఏ జోనర్‌లోకి వస్తుందో కనిపెట్టి చెప్పి స్పెషల్‌ గిఫ్ట్స్‌ సొంతం చేసుకోవాలని దర్శకుడు ప్రశాంత్‌ వర్మ కోరారు. ‘అ!’ సినిమాతో దర్శకుడిగా వెండితెరకు పరిచయమైన ఆయన మొదటి చిత్రంతోనే ప్రేక్షకులను అలరించారు. ప్రస్తుతం ఆయన దర్శకత్వంలో ఓ చిత్రం తెరకెక్కుతున్న విషయం తెలిసిందే. శుక్రవారం ఆయన పుట్టినరోజు సందర్భంగా ఆ సినిమా ప్రీలుక్‌ మోషన్‌ పోస్టర్‌ విడుదల చేశారు. మోషన్‌ పోస్టర్‌ చాలా విభిన్నంగా ఉందంటూ నెటిజన్లు, పలువురు సినీ ప్రముఖులు కామెంట్లు పెట్టారు.

‘నా తదుపరి సినిమాకు సంబంధించిన మోషన్‌ పోస్టర్‌ను మీరు చూశారా? అయితే అది ఏ జోనర్‌లోకి వస్తుందో కనిపెట్టండి. #PV3 అనే హ్యాష్‌ట్యాగ్‌తో మీ సమాధానాలను వెల్లడించండి. సర్‌ప్రైజ్‌ బహుమతులను అందుకోండి క్లూ: తెలుగులో మొదటి చిత్రం’ అని ప్రశాంత్‌ పేర్కొన్నారు. ప్రశాంత్‌ పెట్టిన ట్వీట్‌ చూసిన నెటిజన్లు.. ‘జోంబీ జోనర్‌’ అని పేర్కొంటూ రిప్లైలు ఇస్తున్నారు.