ఈసారి ఒక్క విషయం కూడా చెప్పను: చిరంజీవి

ఇంటర్నెట్‌ డెస్క్‌: ఈ మధ్య మెగాస్టార్‌ చిరంజీవి మైక్‌ పట్టుకుంటే చాలు రాబోయే సినిమా గురించి ఏదో ఒకటి లీక్‌ చేస్తారని అందరూ ఆసక్తి ఎదురుచూస్తున్నారు. అయితే.. ఈసారి అలాంటి ఛాన్స్‌ లేదంటూ ఆయన అందరి ఆశలపై నీళ్లు చల్లారు. గతంలో ఓ సినిమా ప్రచార కార్యక్రమానికి ముఖ్య అతిథిగా వెళ్లిన చిరు వేదికపై మాట్లాడుతూ.. అనుకోకుండా ఓ ఆసక్తికరమైన వార్తను బహిర్గతం చేశారు. కొరటాల శివతో చేస్తున్న చిత్రం ‘ఆచార్య’ అంటూ సినిమా పేరు ప్రకటించేశారు. అది అప్పట్లో హాట్‌టాపిక్‌గా మారింది. దీంతో అప్పటి నుంచి ఆయన ఎప్పుడు మాట్లాడినా.. లీకుల కోసం ఎదురుచూపులు ఎక్కువయ్యాయి. సోషల్‌ మీడియా వేదికగా ఈ విషయంపై సరదా పోస్టులు కూడా దర్శనమిచ్చాయి. అయితే.. ఈ మధ్య సోషల్‌ మీడియాలోకి వచ్చిన చిరు ఇవన్నీ తెలుసుకున్నారో ఏమో..! లీకుల వ్యవహారంపై స్పందించారు.

మెగాస్టార్‌ మేనల్లుడు వైష్ణవ్‌తేజ్‌, కృతిశెట్టి జంటగా బుచ్చిబాబు తెరకెక్కించిన ‘ఉప్పెన’ చిత్రం ప్రీరిలీజ్‌ వేడుక తాజాగా జరిగింది. ఆ కార్యక్రమానికి చిరంజీవి ముఖ్య అతిథిగా హాజరయ్యారు. ఈ సందర్భంగా ఆయన మాట్లాడుతూ.. ‘‘నేను సినిమాలో విషయం మొత్తం ముందే లీక్‌ చేస్తానేమో.. అది నా బలహీనత. నాకు మైక్‌ ఇచ్చేముందు సినిమా వాళ్లందరిలో ఆ అనుమానం ఉండే ఉంటుంది. అయితే.. ఈసారి ఆ ఛాన్స్‌ లేదు. సినిమాలో విషయం ఒక్కటి కూడా అస్సలు బయట చెప్పను. ఈ సినిమా చూసిన వెంటనే ఒక ప్రెస్‌మీట్‌ పెట్టి.. ‘సినిమా ఎంతో గొప్పగా ఉంది.. ఇలాంటి గొప్ప సినిమాలు మీరంతా చూడాలి’ అని చెప్పాలని తపనపడ్డాను. కానీ, నాకు నేనుగా కంట్రోల్‌ చేసుకోవాల్సి వచ్చింది’ అని మెగాస్టార్‌ అన్నారు. ఆ వెంటనే కార్యక్రమానికి వచ్చిన అభిమానులంతా ఈలలు వేస్తూ గోల చేశారు.

ఇవీ చదవండి..

అక్కడ సినిమా తీస్తే హిట్టే!

100 రోజులయ్యాకే నా సినిమా చూస్తా!