Ram Charan: వీడియో కాల్‌లో రామ్ చరణ్‌ క్షమాపణలు.. ఎందుకంటే!

ఇంటర్నెట్‌ డెస్క్‌: ‘ఆర్‌ఆర్ఆర్‌’తో ఆ చిత్రబృందమంతా ప్రపంచవ్యాప్తంగా గుర్తింపు తెచ్చుకుంది. దీంతో పలు కార్యక్రమాలకు అతిథులుగా హాజరై వారంతా సందడి చేస్తున్నారు. తాజాగా జర్మన్‌ యూనిటీ డే సెలబ్రేషన్స్‌ జరిగాయి. ఆ వేడుకలకు ‘ఆర్‌ఆర్ఆర్’ చిత్రబృందం తరపున కీరవాణి హాజరయ్యారు.

తాజాగా భారత్‌లో జర్మన్‌ యూనిటీ వేడుకలు ఘనంగా జరిగాయి. వీటికి భారత్‌లోని జర్మనీ ఎంబసీకి చెందిన సిబ్బంది హాజరయ్యారు. ఈ కార్యక్రమానికి కీరవాణి హాజరు కాగా.. రామ్ చరణ్‌ (Ram Charan) వీడియో కాల్‌లో అందరినీ పలకరించారు. ఈ వేడుకలకు రాలేకపోయినందుకు క్షమాపణలు చెప్పారు. తాను వ్యక్తిగత పర్యటనలో భాగంగా ఇటలీ వెళ్లాల్సి వచ్చిందని అందుకే రాలేకపోయినట్లు తెలిపారు. ఆ ఈవెంట్‌లో నాటునాటు పాటకు సంబంధించిన కటౌట్‌ను చూసి తనకెంతో ఆనందం వేసినట్లు చెప్పారు. అవకాశం ఉన్నప్పుడు వారందరినీ కలుస్తానని మాటిచ్చారు.

సీక్రెట్‌ ఎంగేజ్‌మెంట్‌పై ప్రశ్న.. రణ్‌వీర్‌ ఏమన్నారంటే..!

ఇక ఈ కార్యక్రమంలో వేదికపై  కీరవాణి జర్మన్‌ లాంగ్వేజ్‌లో పాట పాడి అందర్నీ ఉత్సాహపరిచారు. ఆ తర్వాత జర్మన్‌ దౌత్యసిబ్బంది అందరూ కలిసి నాటునాటు పాటకు డ్యాన్స్‌ వేసి సందడి చేశారు. దీనికి సంబంధించిన ఫొటోలు, వీడియోలను జర్మన్‌ ఇండియా సోషల్‌మీడియాలో పోస్ట్‌ చేసింది. ఈ సందర్భంగా కీరవాణి మాట్లాడుతూ..‘‘నాటునాటు’ పాటకు ఆస్కార్‌ వస్తుందని కలలో కూడా ఊహించలేదు. ఆ పాటకు మంచి ప్రేక్షకాదరణ దక్కుతుందని భావించానంతే. ఇక ఆ ఆస్కార్‌ భారతీయ సినిమాకు ఒక ప్రోత్సాహం. ఒక గొప్ప శకానికి నాంది అని భావిస్తున్నా’ అని వెల్లడించారు.