RRR: సైబరాబాద్‌ ట్రాఫిక్‌ పోలీస్‌ క్రియేటివిటీ!

ఇంటర్నెట్‌డెస్క్‌: హైదరాబాద్‌ మహానగరంలో నిత్యం వేల సంఖ్యలో వాహనాలు రోడ్లపై తిరుగుతుంటాయి. ప్రతి ఒక్కరూ ట్రాఫిక్‌ రూల్స్‌ పాటించాలని, హెల్మెట్‌, సీటు బెల్టు లేని ప్రయాణం ప్రాణానికి ప్రమాదమని పోలీసులు హెచ్చరిస్తూనే ఉంటారు. అయినా కొందరి నిర్లక్ష్యం కారణంగా పలువురు ఆస్పత్రి పాలవుతుండగా, ఇంకొందరు ప్రాణాలనే కోల్పోతున్నారు. ఈ విషయంలో సైబరాబాద్‌ ట్రాఫిక్‌ పోలీసులు సామాజిక మాధ్యమాల వేదికగా ప్రజలకు అవగాహన కల్పిస్తూ, అప్రమత్తం చేస్తున్నారు. ట్విటర్‌ వేదికగా అనేక మీమ్స్‌ తయారు చేసి పోస్ట్‌ చేస్తున్నారు.

ఎన్టీఆర్‌, రామ్‌చరణ్‌ కథానాయకులుగా రాజమౌళి దర్శకత్వంలో తెరకెక్కుతున్న చిత్రం ‘ఆర్ఆర్‌ఆర్‌’. తాజాగా చిత్ర బృందం ఓ పోస్టర్‌ను విడుదల చేసింది. బైక్‌పై ఎన్టీఆర్‌, రామ్‌చరణ్‌ కలిసి వెళ్తున్న పోస్టర్‌ అభిమానులను ఆకట్టుకుంది. కాగా, ఆ ఫొటోతోనే సైబరాబాద్‌ ట్రాఫిక్‌ పోలీసులు అవగాహన కల్పించాలని సంకల్పించారు. ఇంకేముంది వారి సోషల్‌ మీడియా విభాగం తాజా పోస్టర్‌లోని ఎన్టీఆర్‌, రామ్‌చరణ్‌లకు హెల్మెట్‌ జోడించి, ‘ఇప్పుడు సరిగ్గా ఉంది. హెల్మెట్‌ ధరించండి. సురక్షితంగా ఉండండి’ అని క్యాప్షన్‌ ఇచ్చింది. దీనికి ‘ఆర్ఆర్‌ఆర్‌’ టీమ్‌ కూడా స్పందించింది. ‘ఇప్పటికీ పర్‌ఫెక్ట్‌గా లేదు. నంబర్‌ ప్లేట్‌ మిస్సయింది’ అంటూ సమాధానం ఇచ్చింది. ప్రస్తుతం సామాజిక మాధ్యమాల వేదికగా ఈ ఫొటో వైరల్‌ అవుతోంది. ఇదే విధంగా ట్రాఫిక్‌ నిబంధనలపై అవగాహన కల్పించడంపై గతంలోనూ సైబరాబాద్‌ ట్రాఫిక్‌ పోలీసులు చేసిన కొన్ని మీమ్స్‌ చూసేయండి.