Samantha: ‘దీనికి ముగింపు పలకాల్సిన సమయం వచ్చింది’.. వైరలవుతోన్న సమంత పోస్ట్‌

హైదరాబాద్‌: స్టార్‌ హీరోయిన్‌ సమంత (Samantha) ప్రస్తుతం ‘ఖుషి’(Kushi) సినిమాలో నటిస్తోంది. అలాగే సిటడెల్‌ (Citadel) వెబ్‌ సిరీస్‌లోనూ కనిపించనుంది. అయితే, కొన్ని రోజులుగా ఆమెకు సంబంధించిన ఓ వార్త నెట్టింట వైరల్‌గా మారింది. సమంత ఏడాది పాటు సినిమాలకు విరామం ఇవ్వనున్నట్లు ప్రచారం జరుగుతోంది. తాజాగా సామ్‌ ఇన్‌స్టా స్టోరీ చూస్తే అది నిజమే అనిపిస్తోంది.

తన ఇన్‌స్టాలో కారవాన్‌ ఫొటో పెట్టిన సమంత..‘‘మరో మూడు రోజులు మాత్రమే ఈ కారవాన్‌లో ఉండేది’’ అని పెట్టింది. అలాగే తన ఫొటో షేర్‌ చేస్తూ.. ‘‘ఆరు నెలలు కష్టంగా గడిచాయి. ఇక దీనికి ముగింపు పలకాల్సిన సమయం వచ్చింది’’ అని రాసింది. దీంతో తాను ఎంత కష్టంగా షూటింగ్స్‌లో  పాల్గొందో అని ఆమె అభిమానులు అనుకొంటున్నారు. ఇక ఈ పోస్ట్‌ చూసి అభిమానులు, నెటిజన్లు ఆమె త్వరగా కోలుకుని మళ్లీ సినిమాల్లో నటించాలని కోరుకుంటూ కామెంట్స్‌ పెడుతున్నారు. 

• ఇదీ చదవండి:  త్రిష విషయంలో ఆ ప్రచారమే నిజమైంది

ప్రస్తుతం విజయ్‌దేవకొండ (Vijay Deverakonda) సరసన సమంత (Samantha) నటిస్తోన్న ‘ఖుషి’(Kushi) చిత్రీకరణ చివరిదశకు చేరుకుంది. శివ నిర్వాణ దర్శకత్వం వహిస్తోన్న ఈ సినిమాపై భారీ అంచనాలు నెలకొన్నాయి. ఇప్పటికే ‘నా రోజా నువ్వే...’ అంటూ సాగే పాటని విడుదల చేయగా అది ట్రెండింగ్‌లో నిలిచింది. సామాజిక మాధ్యమాల్లోనూ వంద మిలియన్ల వ్యూస్‌కి చేరువలో ఉంది. ఈ సినిమాను సెప్టెంబరు 1న తెలుగుతోపాటు, తమిళం, మలయాళం, కన్నడ, హిందీ భాషల్లో విడుదల చేయనున్నారు.