‘సారంగ దరియా’ రికార్డు!

ఇంటర్నెట్‌ డెస్క్‌: ‘లవ్‌ స్టోరి’ చిత్రంలోని సారంగ దరియా గీతం సరికొత్త రికార్డు సృష్టించింది. విడుదలైన (యూట్యూబ్‌లో) అనతి కాలంలోనే 1 మిలియన్‌ లైక్స్‌ సొంతం చేసుకున్న తొలి తెలుగు పాటగా నిలిచింది. ఫిబ్రవరి 28న కథానాయిక సమంత ఈ పాటని విడుదల చేశారు. ఇప్పటి వరకు 90 మిలియన్లకి పైగా వీక్షణలు సొంతం చేసుకుని, శ్రోతల్లో జానపదానికి ఉన్న ఆదరణ ఎలాంటిదో తెలియజేస్తోంది ఈ గీతం. పాటకు తగినట్టు సాయి పల్లవి చేసిన నృత్యం ప్రతి ఒక్కరినీ ఆకట్టుకుంటోంది.

ఈ గీతానికి సుద్దాల అశోక్‌ తేజ సాహిత్యం అందించగా పవన్‌ సి.హెచ్‌. స్వరాలు సమకూర్చారు. మంగ్లీ ఆలపించారు. నాగ చైతన్య, సాయి పల్లవి జంటగా తెరకెక్కుతోంది ఈ ‘లవ్‌ స్టోరి’. శేఖర్ కమ్ముల దర్శకుడు. నారాయణదాస్‌ నారంగ్‌, పి.రామ్మోహన్‌రావు నిర్మిస్తున్నారు. ఏప్రిల్‌ 16న ప్రేక్షకుల ముందుకు రాబోతుంది. ఈ చిత్రంలోని ఇతర పాటలకూ మంచి ఆదరణ లభిస్తోంది.