Sarkaru vari pata: ‘సర్కారు వారి పాట’ ఫస్ట్‌ డే కలెక్షన్స్‌.. సరికొత్త రికార్డు

ఇంటర్నెట్‌ డెస్క్‌: పరశురామ్‌ దర్శకత్వంలో సూపర్‌స్టార్‌ మహేశ్‌బాబు కథానాయకుడిగా నటించిన తాజా చిత్రం ‘సర్కారు వారి పాట’. ప్రపంచవ్యాప్తంగా మే 12న విడుదలైన ఈ సినిమా యాక్షన్‌ ఎంటర్‌టైనర్‌గా అలరిస్తోంది. అంతేకాదు, కలెక్షన్ల విషయంలోనూ దూసుకుపోతోంది. మొదటిరోజు రూ.75కోట్ల వసూళ్లు సాధించి, ఆల్‌ టైమ్‌ రికార్డు సృష్టించింది. తెలుగు రాష్ట్రాలతో పాటు భారతదేశంలోని ఇతర ప్రాంతాలు, ఓవర్సీస్‌లోనూ భారీగా కలెక్షన్‌లు తన ఖాతాలో వేసుకుంది. ఇప్పటికే అమెరికాలో 1మిలియన్‌ డాలర్ల మార్క్‌ను దాటేసింది. మరో రెండు వారాల్లో ఆశించిన దాని కంటే ఎక్కువ వసూళ్లు చేస్తుందని సినీ నిపుణులు చెబుతున్నారు.  ప్రస్తుతం భారీ సినిమాలు లేకపోవడం, వేసవి సెలవులు కావడం బాగా కలిసి వస్తుందంటున్నారు. మహేశ్‌ సరసన కీర్తి సురేశ్‌ నటించిన ఈ సినిమాలో సముద్రఖని, సుబ్బరాజు, పోసాని కృష్ణమురళి తదితరులు నటించారు. నవీన్‌ యెర్నేని, వై. రవి శంకర్‌,రామ్‌ ఆచంట, గోపీచంద్‌ ఆచంట నిర్మించిన ఈ చిత్రానికి తమన్‌ స్వరాలు సమకూర్చారు.