Kasthuri: ‘సరోగసి’పై నటి ట్వీట్‌ దుమారం..!

హైదరాబాద్‌: నటి నయనతార, ఆమె భర్త విఘ్నేశ్‌ శివన్‌ తల్లిదండ్రులైన విషయం తెలిసిందే. సరోగసి పద్ధతిలోనే ఈ జంట తల్లిదండ్రులైనట్లు వార్తలు వస్తున్నాయి. ఈ క్రమంలోనే నటి కస్తూరి చేసిన ఓ ట్వీట్‌ ఇప్పుడు నెట్టింట చర్చనీయాంశంగా మారింది. ‘‘ఇండియాలో సరోగసి బ్యాన్. 2022 నుంచి ఈ చట్టం అమల్లోకి వచ్చింది. క్లిష్ట పరిస్థితుల్లో తప్ప దీనిని ప్రోత్సహించకూడదు. రానున్న రోజుల్లో దీని గురించి ఎక్కువగా వినబోతున్నాం’’ అంటూ ఆమె ఓ ట్వీట్‌ చేసింది. దీనిని చూసిన నయనతార అభిమానులు కస్తూరిపై ఆగ్రహం వ్యక్తం చేస్తున్నారు. ‘మీ పని మీరు చూసుకోండి’ అని కామెంట్లు చేస్తున్నారు. దీనిపై ఆమె స్పందిస్తూ.. ‘‘అర్హత గల  న్యాయవాదిగా ఈ చట్టంపై విశ్లేషణ చేసే హక్కు నాకు ఉంది. నేను ఎవర్నీ ఉద్దేశించి ఈ ట్వీట్‌ పెట్టలేదు’’ అని తెలిపారు.

నెటిజన్‌పై ఆగ్రహం..

‘మెగాస్టార్‌ చిరంజీవి (Chiranjeevi) అంటే మీకు ఇష్టం లేదట కదా’ అంటూ ట్వీట్‌ చేసిన ఓ నెటిజన్‌పై కస్తూరి (Kasthuri) ఆగ్రహం వ్యక్తం చేశారు. చిరు ప్రధాన పాత్రలో నటించిన ‘గాడ్‌ఫాదర్‌’లో ఓ చిన్న రోల్‌ చేసిన కస్తూరి.. ఇటీవల ఈ సినిమా సక్సెస్‌ మీట్‌లో పాల్గొన్నారు. దీనిపై ఓ నెటిజన్‌ స్పందిస్తూ.. ‘‘గాడ్‌ఫాదర్‌’ సక్సెస్‌మీట్‌ ఫొటోలు షేర్‌ చేయండి. మీకు చిరంజీవి అంటేనే అస్సలు నచ్చదట కదా. ఈ విషయాన్ని మా తల్లిదండ్రులు చెప్పారు. అలాంటప్పుడు ఆయన సినిమాలో ఎందుకు నటించారు?’’ అని ట్వీట్‌ పెట్టాడు.

దీనిపై కస్తూరి స్పందిస్తూ ‘‘ఏం మాట్లాడుతున్నారు? ఈ పిచ్చిమాటలు ఎందుకు? చిరంజీవి అంటే ఇష్టపడని వారుండరు. అలాంటిది నా విషయంలో మీ తల్లిదండ్రులు అలా చెప్పడానికి కారణం ఏమిటో నాకు అర్థం కావడం లేదు’’ అని అసహనం వ్యక్తం చేశారు.