స్టార్‌హీరో ఇంట్లోకి చొరబడి.. ఎనిమిది గంటలు మేకప్‌రూమ్‌లోనే దాక్కొని..

ముంబయి: జీవితంలో ఒక్కసారైనా తమ అభిమాన హీరోని కలవాలని ప్రతి ఒక్కరూ అనుకుంటారు. అందుకోసం ఎన్నో ప్రయత్నాలు చేస్తుంటారు. తమ కలను నెరవేర్చుకోవడం కోసం అడ్డుదారులు తొక్కి కొంతమంది చిక్కుల్లోపడతారు. తాజాగా ఇలాంటి ఘటనే బాలీవుడ్‌ బాద్‌షా షారుఖ్‌ ఖాన్‌ (Shah Rukh Khan) ఇంట చోటు చేసుకుంది. షారుఖ్‌ను చూడాలనే ఆశతో ఇద్దరు యువకులు అత్యుత్సాహం కనబరిచి.. చివరికి పోలీస్‌ స్టేషన్‌ బాటపట్టారు. గతవారం చోటుచేసుకున్న ఈ ఘటనకు సంబంధించిన వివరాలను తాజాగా ముంబయి పోలీసులు వెల్లడించారు.

గుజరాత్‌కు చెందిన 18ఏళ్ల సాహిల్ సలీం ఖాన్, అతడి స్నేహితుడు 19 ఏళ్ల రామ్‌ కుశువ.. షారుఖ్‌(Shah Rukh Khan)ని చూడాలని గతవారం మన్నత్‌ (షారుఖ్‌ ఖాన్‌ నివాసం)లోకి చొరబడ్డారు. భద్రతా సిబ్బంది కళ్లు గప్పి మార్చి 1వ తేదీ అర్ధరాత్రి బంగ్లాలోకి ప్రవేశించిన వీరు.. మూడో అంతస్తులో ఉన్న హీరో మేకప్‌ రూమ్‌లో సుమారు ఎనిమిది గంటలపాటు దాక్కొన్నారు. ఉదయాన్నే వీరిని చూసి షాకైన షారుఖ్‌ సిబ్బంది.. పోలీసులకు సమాచారం అందించారు. కేసు నమోదు చేసుకున్న పోలీసులు దర్యాప్తు అనంతరం వివరాలు వెల్లడించారు. భద్రతను కట్టుదిట్టం చేసుకోవాల్సిందిగా షారుఖ్‌కు సూచించారు.