Trisha: అప్పుడే పెళ్లి..

దక్షిణాదిలో స్టార్‌ హీరోలందరితోనూ ఆడిపాడిన నాయిక త్రిష (Trisha). ప్రస్తుతం ఎక్కువశాతం నాయికా ప్రాధాన్య చిత్రాలతో అలరిస్తోన్న ఈ నాయిక ఇటీవలే మణిరత్నం ‘పొన్నియిన్‌ సెల్వన్‌’లో (ponniyin selvan) రాజకుమారిగా నటించింది. తమిళనాట ఈ సినిమాకు మంచి ఆదరణ లభించింది. ఆమె చిత్రపరిశ్రమలోకి అడుగుపెట్టి రెండు దశాబ్దాలు పైనే అయ్యింది. ఆమె పెళ్లి భాజాలు ఎప్పుడు మోగుతాయో అని అభిమానులు ఆసక్తిగా ఎదురుచూస్తున్నారు. ఇదే విషయాన్ని ఈ మధ్య ఓ ఇంటర్వ్యూలో అడిగితే త్రిష స్పందించింది. ‘‘పెళ్లి ఎందుకు చేసుకోలేదు అంటే నా వద్ద సమాధానం లేదు. పెళ్లి ఎప్పుడు చేసుకుంటానో మాత్రం నాకే తెలియదు. నా మనసుకు నచ్చిన వ్యక్తి దొరికితే కచ్చితంగా చేసుకుంటాను. నన్ను పెళ్లి చేసుకోబోయేవాడు జీవితాంతం నాకు తోడు ఉంటాడనే నమ్మకం కలగాలి. అప్పుడే చేసుకుంటాను. పెళ్లి చేసుకొని విడాకులు తీసుకోవడం నాకు ఇష్టం లేదు. పెళ్లి చేసుకొని చాలామంది అసంతృప్తితో జీవిస్తున్నారు. అలాంటి పరిస్థితి నాకు ఎదురుకాకూడదు’’ అని చెప్పింది.