Mahaan: ‘బార్‌ లీజ్‌.. సిండికేట్‌ మనిషై ఉండాలి’

చెన్నై: ‘‘ఈరోజు ఈ రాష్ట్రంలో ఎవరు బార్‌ లీజ్‌ తీసుకున్నా.. అతను తప్పకుండా మన సిండికేట్‌ మనిషై ఉండాలి. మనం పెట్టిందే చట్టం. మనం పోసేదే మద్యం’’ అని అంటున్నారు నటుడు విక్రమ్‌. ఆయన ప్రధాన పాత్రలో నటించిన యాక్షన్‌ ఎంటర్‌టైనర్‌ ‘మహాన్‌’. కార్తిక్‌ సుబ్బరాజు దర్శకత్వం వహించిన ఈ సినిమా ఫిబ్రవరి 10న అమెజాన్‌ ప్రైమ్‌ వేదికగా ప్రేక్షకుల ముందుకు రానుంది. ఈ సినిమా కోసం మొదటిసారి విక్రమ్‌ ఆయన తనయుడు ధ్రువ్‌ స్క్రీన్‌ షేర్ చేసుకున్నారు. తాజాగా ‘మహాన్‌’ ట్రైలర్‌ను చిత్రబృందం విడుదల చేసింది. మద్యాన్ని నిషేధించాలంటూ కొంతమంది వ్యక్తులు చేసే ఉద్యమ సన్నివేశాలతో ప్రారంభమైన ఈ టీజర్‌ ఆద్యంతం ఆకట్టుకునేలా ఉంది. మద్యం, ఇతర అసాంఘిక కార్యక్రమాలకు వ్యతిరేకంగా ఒక మహాత్ముడిలా జీవిస్తానంటూ చిన్నప్పుడే తండ్రికి మాటిచ్చిన హీరో.. పెద్దయ్యాక ఆ మాటను నిలబెట్టుకున్నాడా? సమాజంలో అతన్ని ప్రభావితం చేసిన అంశాలేమిటి? ఇలాంటి ఎన్నో ఆసక్తికర విషయాలతో ఈ చిత్రం రూపుదిద్దుకుంది.