Yashoda: ‘యశోద’ ఓటీటీలోకి వచ్చేస్తోంది.. స్ట్రీమింగ్‌ ఎక్కడంటే?

ఇంటర్నెట్‌ డెస్క్‌: సమంత ప్రధాన పాత్ర పోషించిన ‘యశోద’ (Yashoda) చిత్రం ఓటీటీలోకి వచ్చేందుకు సిద్ధమైంది. ‘అమెజాన్‌ ప్రైమ్‌ వీడియో’ (Amazon Prime Video)లో ఈ నెల 9 నుంచి ఈ సినిమా స్ట్రీమింగ్‌ కానుంది. తెలుగు, మలయాళం, తమిళం, కన్నడ, హిందీ భాషల్లో ఈ చిత్రం అందుబాటులో ఉంటుందని సదరు సంస్థ సోషల్‌ మీడియా వేదికగా ప్రకటించింది. హరి- హరీశ్‌ సంయుక్తంగా దర్శకత్వం వహించిన ఈ సినిమా థియేటర్లలో నవంబరు 11న విడుదలైన సంగతి తెలిసిందే. సమంత (Samantha) నటనకు ప్రేక్షకులు మంచి మార్కులు వేశారు. సరోగసి పేరుతో జరిగే మోసాల నేపథ్యంలో రూపొందిన ఈ చిత్రంలో వరలక్ష్మి శరత్‌కుమార్‌, ఉన్ని ముకుందన్‌, రావు రమేశ్‌, మురళీ శర్మ తదితరులు కీలక పాత్రలు పోషించారు.

ఇదీ కథ: య‌శోద (స‌మంత) మ‌ధ్య త‌ర‌గ‌తి అమ్మాయి. ఆర్థిక అవ‌స‌రాల రీత్యా స‌రోగ‌సి ప‌ద్ధ‌తిలో బిడ్డ‌కి జ‌న్మ‌నివ్వ‌డం కోసం డా. మ‌ధు (వ‌ర‌ల‌క్ష్మి శ‌రత్‌కుమార్‌)కి చెందిన ఆస్ప‌త్రిలో చేరుతుంది. ప్ర‌త్యేక ప్ర‌పంచంలా అనిపించే ఆ హాస్పిటల్‌లో జ‌రిగే కొన్ని ప‌రిణామాలు య‌శోద‌లో అనుమానం రేకెత్తిస్తాయి. త‌న‌తోపాటు బిడ్డ‌ల‌కి జ‌న్మ‌నివ్వ‌డం కోసం ఆస్ప‌త్రిలో చేరిన తోటి మ‌హిళ‌లు అనుమానాస్ప‌ద రీతిలో క‌నుమ‌రుగైపోతుంటారు. ఇంత‌కీ ఆ మ‌హిళ‌లు ఏమ‌వుతున్నారు? య‌శోద త‌న అనుమానాల్ని నివృత్తి చేసుకోవ‌డం కోసం ఏం చేసింది? ఆ ఆ క్ర‌మంలో ఆమెకి ఎలాంటి విష‌యాలు తెలిశాయి? ఆ ఆస్ప‌త్రిలో సంఘ‌ట‌న‌ల‌కీ, బ‌య‌ట జ‌రిగిన మ‌రో రెండు హ‌త్య‌ల‌కీ సంబంధమేమిటనేది మిగతా క‌థ‌.