TANA: తానా మహాసభలు విజయవంతం.. దాతలు, వాలంటీర్లకు ఘన సన్మానం

ఫిలడెల్ఫియా: ఉత్తర అమెరికా తెలుగు సంఘం (TANA) మహాసభలు  అమెరికాలోని ఫిలడెల్ఫియాలో పెన్సిల్వేనియా కన్వెన్షన్‌ సెంటర్‌లో జులై 7 నుంచి 9 వరకు అంగరంగ వైభవంగా జరిగిన విషయం తెలిసిందే. ఈ మహాసభల విజయవంతానికి కృషిచేసిన వాలంటీర్లు, సాయం చేసిన దాతలను మహాసభ నిర్వాహకులు ఘనంగా సన్మానించారు. జులై 30న ఫిలడెల్ఫియాలో వార్మింస్టర్‌లోని లంచ్‌ ఆన్‌ మీటింగ్‌ పేరిట నిర్వహించిన సభలో వారి సేవలను ప్రశంసించారు. ఈ సమావేశానికి తానా నాయకులు హాజరయ్యారు. 

ఈ సందర్భంగా తానా పూర్వ అధ్యక్షుడు అంజయ్య చౌదరి లావు మాట్లాడుతూ.. గతంలో ఎన్నడూ జరగని రీతిలో ఈసారి తానా మహాసభలు జరిగాయన్నారు. అందరి సహకారంతోనే విజయవంతమయ్యాయని చెప్పారు. ఇందుకు కృషిచేసిన వాలంటీర్లు, దాతలు, స్పాన్సర్లకు ఆయన కృతజ్ఞతలు తెలిపారు.   అనంతరం కాన్ఫరెన్స్‌ కన్వీనర్‌ రవి పొట్లూరి మాట్లాడుతూ.. ఈ సభల విజయవంతం చేసేందుకు ఏర్పాటు చేసిన కమిటీల సభ్యులందరూ పూర్తి సమయాన్ని కేటాయించారని.. వారికి, వారి కుటుంబ సభ్యులకు ధన్యవాదాలు చెప్పారు. కమిటీలన్నీ తమకు అప్పగించిన బాధ్యతలను సక్రమంగా చేయడం వల్లే ఈ మహాసభలు ఇంత దిగ్విజయంగా ముగిశాయని కాన్ఫరెన్స్‌ ఛైర్మన్‌ శ్రీనివాస్‌ లావు అన్నారు. కమిటీ సభ్యుల మధ్య పరస్పర సహకారం, కార్యక్రమాలపై మంచి అవగాహన ఏర్పరుచుకొని ప్రణాళికా బద్ధంగా కార్యక్రమాలు జరిగేలా చూశారని కాన్ఫరెన్స్‌ సెక్రటరీ సతీష్‌ తుమ్మల అన్నారు.  మిడ్‌ అట్లాంటిక్‌ రీజినల్‌ రిప్రజెంటేటివ్‌ సునీల్‌ కోగంటి మాట్లాడుతూ..  తమ రీజియన్‌లో ఉన్న తానా నేతలతో పాటు ఇతరచోట్ల ఉన్న సభ్యులందరూ స్వచ్ఛందంగా ఈ మహాసభల విజయవంతానికి సహకరించారన్నారు.

ఈ మహాసభలు దిగ్విజయమయ్యేలా కృషిచేసిన 60 కమిటీలను ఈ కార్యక్రమంలో ఘనంగా సత్కరించారు. అందరికీ జ్ఞాపికలను అందజేశారు. ఎన్టీఆర్‌ శతజయంతి కార్యక్రమంలో భాగంగా చిత్రీకరించిన ఎన్‌బీకే వీడియోను ఈ కార్యక్రమంలో ప్రదర్శించారు. తానా మహాసభలకు డోనర్లుగా వ్యవహరించిన వారికి, స్పాన్సర్లుగా ఉన్న వారిని కూడా ఈ కార్యక్రమంలో భాగంగా వేదికపైకి ఆహ్వానించి ఘనంగా సన్మానించారు. వారికి జ్ఞాపికలను అందజేశారు. అలాగే, తానా పూర్వ కార్యవర్గ సభ్యులను, ప్రస్తుత కార్యవర్గ సభ్యులను అభినందిండంతో పాటు వారికి సన్మానం చేశారు. ఈ కార్యక్రమంలో ఎగ్జిక్యూటివ్ వైస్ ప్రెసిడెంట్ డాక్టర్ నరేన్ కొడాలి, ట్రెజరర్ రాజా కసుకుర్తి, బోర్డ్ ఆఫ్ డైరెక్టర్స్ లక్ష్మి దేవినేని, జనార్దన్ నిమ్మలపూడి, జాయింట్ ట్రెజరర్ సునీల్ పాంత్రా, ఫౌండేషన్ ట్రస్టీలు విద్యాధర్ గారపాటి, శ్రీనివాస్ ఓరుగంటి, సతీష్ మేకా, న్యూజెర్సీ రీజనల్ కోఆర్డినేటర్ రామకృష్ణ వాసిరెడ్డి, తానా 23వ మహాసభల్లో వివిధ కమిటీలలో సేవలందించిన ఛైర్మన్లు, సభ్యులు పాల్గొన్నారు. తానా మహాసభలకు దాదాపు 18 వేల మందికిపైగా తెలుగువారు హాజరై విజయవంతం చేశారు.