తక్కెడశిల జానికి యువ పురస్కారం

డీకే చదువుల బాబుకు బాల పురస్కారం

ఈనాడు, దిల్లీ: ప్రముఖ విమర్శకుడు తక్కెడశిల జాని, ప్రముఖ రచయిత డీకే చదువులబాబులను కేంద్ర సాహిత్య అకాడమీ యువ, బాల పురస్కారాలు వరించాయి. వివిధ భాషల్లోని చిరు కథలు, కవిత్వం, నాటకాలు, నవలలు, విమర్శ గ్రంథాలకు కేంద్ర సాహిత్య అకాడమీ యువ, బాల పురస్కారాలు-2023ను శుక్రవారం ప్రకటించింది. దేశవ్యాప్తంగా వివిధ భాషలకు చెందిన బాల సాహిత్యానికి సంబంధించి 22 మందికి, యువ పురస్కారాలకు 20 మందిని ఎంపిక చేసింది. ఇందులో తెలుగుకు సంబంధించి యువ పురస్కారాన్ని తక్కెడశిల జాని రచించిన విమర్శన గ్రంథం ‘వివేచని’, బాల పురస్కారాన్ని డీకే చదువుల బాబు చిరుకథల పుస్తకం ‘వజ్రాల వాన’ దక్కించుకున్నాయి. వీరిద్దరూ వైయస్సార్‌ జిల్లాకు చెందినవారే కావడం విశేషం. ఈ అవార్డుల కింద రచయితలకు రూ.50 వేల చొప్పున నగదు, తామ్ర పత్రం, జ్ఞాపిక అందజేస్తారు.

ఇద్దరిదీ ఒకే జిల్లా

• చదువులబాబు వైయస్సార్‌ జిల్లా పెద్ద ముడియం మండలం పెద్ద పసుపుల గ్రామంలో 1967, జూన్‌ 1న జన్మించారు. తల్లిదండ్రులు దస్తగిరమ్మ, ఖాసీం సాహెబ్‌. ప్రస్తుతం కమలాపురం మండలం పెద్దచెప్పల్లి జడ్పీ ఉన్నత పాఠశాలలో తెలుగు ఉపాధ్యాయుడిగా పనిచేస్తున్నారు. చిన్నారులను ఆకట్టుకునేలా ఆయన ఎన్నో చిరు కథలు, నవలలు రాశారు. 2003లోనే ‘బాలల కథలు’ సంపుటిని వెలువరించారు. 
• తక్కెడశిల జాని వైయస్సార్‌ జిల్లా పులివెందులలో 1991 జూన్‌ 8న జన్మించారు. తల్లిదండ్రులు తక్కెడశిల ఆశ, చాంద్‌ బాషా. సాఫ్ట్‌వేర్‌ ఇంజినీర్‌ అయిన జాని పలు దీర్ఘ కావ్యాలు, కథా సంపుటాలు, నవలలు, సాహిత్య విమర్శ గ్రంథాలు వెలువరించారు.