ప్రాణాలు తీసిన పెద్దపులిని పట్టేశారు

మహారాష్ట్రలోని బల్లార్ష-కార్వా అటవీ ప్రాంతంలో నాలుగు నెలల కాలంలో నలుగురు వ్యక్తుల ప్రాణాలు తీసిన టి-86 అనే పెద్దపులిని ఎట్టకేలకు అటవీ అధికారులు సోమవారం రాత్రి పట్టుకుని చంద్రపూర్‌కు తరలించారు. అటవీ అధికారి నరేశ్‌ బావరే తెలిపిన వివరాల ప్రకారం.. అటవీ సమీప గ్రామాల్లోని ముగ్గురు పురుషులు, ఓ మహిళను, పశువులను పెద్దపులి హతమార్చిందన్నారు. పులిని పట్టుకునేందుకు సీసీ కెమెరాలు, బోన్లు అమర్చి ప్రత్యేక బృందాలతో గాలింపు చేపట్టామన్నారు. ఈ నేపథ్యంలో సోమవారం సాయంత్రం పులి కార్వా అడవిలో సంచరిస్తోందని గుర్తించి.. షూటర్‌ అవినాష్‌ ఫూల్‌జలేను రంగంలోకి దింపి మత్తు సూది ఇచ్చామన్నారు. అటవీశాఖ వైద్యాధికారి కుందన్‌ ఆధ్వర్యంలో పులిని బోనులో బంధించడంతో పరిసర ప్రాంతాల ప్రజలు ఊపిరిపీల్చుకున్నట్లు పేర్కొన్నారు. 

న్యూస్‌టుడే, బల్లార్ష