Japan: రూ.2.2 కోట్లకు అమ్ముడు పోయిన భారీ టూనా..!

ఇంటర్నెట్‌డెస్క్‌: జపాన్‌(Japan)లోని టోక్యోలో నూతన సంవత్సరం సందర్భంగా నిర్వహించిన ఓ వేలం పాటలో 212 కిలోల టూనా చేప భారీ ధరకు అమ్ముడుపోయింది. టోక్యో నగరంలోని టయోసు చేపల మార్కెట్‌లో జరిగిన వేలంలో బ్లూఫిన్‌ రకం టూనాను వేలం వేశారు. గతేడాది వేలంలో పలికిన రేటు కంటే ఇది రెట్టింపు ధరకు అమ్ముడుపోయింది. ఈ చేపను ఉత్తర అమెరికాలో ఒమా వద్ద పట్టుకొన్నారు. ఒమా వద్ద దొరికే బ్లూఫిన్‌ రకం టూనాలను ‘బ్లాక్‌ డైమండ్స్‌’గా అభివర్ణిస్తారు. ఇవి చాలా ధర పలుకుతాయి.

తాజాగా జరిగిన వేలంలో ఈ బ్లూఫిన్‌ను సూషీ ఛైన్‌ ఆపరేటర్‌ ఒనోడెరా గ్రూప్‌ దక్కించుకొంది. ఇందుకోసం 2,75,000 డాలర్లు (రూ.2.26 కోట్లు) చెల్లించేందుకు ముందుకొచ్చింది. ఈ టూనాను టోక్యోలోని తమ రెస్టారెంట్లలో వండి వడ్డిస్తామని ఒనోడెరా ప్రతినిధి తెలిపారు.  మరోవైపు ఈ టూనాకు భారీ ధర పలకడంపై టయోసు మార్కెట్‌ దుకాణదారులు సంతోషం వ్యక్తం చేస్తున్నారు. కరోనా మహమ్మారి తర్వాత జపాన్‌ (Japan) ప్రజలు రెస్టారెంట్లకు వెళ్లేందుకు తిరిగి ఆసక్తి చూపుతున్నారన్న దానికి దీనిని సంకేతంగా భావిస్తున్నారు. సాధారణంగా  జపాన్‌(Japan)లో ఏటా నూతన సంవత్సర సంబరాల్లో జరిగే వేలం ధరలు ఎక్కువగానే ఉంటాయి. ఈ సారి టూనాకు లభించిన ధర అంచనాలను మించి ఉంది.