A-23a: ఎట్టకేలకు కదిలిన అతిపెద్ద మంచుఫలకం

లండన్‌: దాదాపు దుబాయ్‌ అంత విస్తీర్ణంతో ప్రపంచంలోకెల్లా అతిపెద్ద మంచుఫలకంగా(Worlds biggest iceberg) గుర్తింపు పొందిన ‘ఎ-23ఎ’(A-23a).. 30 ఏళ్లకుపైగా విరామం తర్వాత ఎట్టకేలకు కదిలింది. 1986లో అంటార్కిటిక్‌ తీరరేఖ నుంచి విడిపోవడం ద్వారా ఎ-23ఎ ఏర్పడింది. ఆపై అది కొంత దూరం ప్రయాణించి, వెడ్డెల్‌ సముద్రంలో అడుగు భాగాన్ని తాకి నిలిచిపోయింది. దాని విస్తీర్ణం 4 వేల చదరపు కిలోమీటర్లు. దుబాయ్‌ విస్తీర్ణం 4,114 చదరపు కిలోమీటర్లు. ప్రస్తుతం మంచుఫలకం ఎట్టకేలకు సాగర అడుగు భాగం నుంచి వేరుపడి.. వేడి జలాల వైపు కదులుతున్నట్లు పరిశోధకులు గుర్తించారు. ప్రపంచంలోని చాలా పెద్ద మంచుఫలకాలకు భిన్నంగా.. ఎ-23ఎ తన ఆవిర్భావం నాటినుంచి ఇప్పటిదాకా కేవలం కొన్ని వందల కిలోమీటర్లు మాత్రమే కదిలిందని వారు పేర్కొన్నారు.