మండల్‌ సిఫార్సులపై కేంద్రం వైఖరి స్పష్టం చేయాలి

జాతీయ ఓబీసీ మహా సభ డిమాండ్‌

ఈనాడు, దిల్లీ: మండల్‌ కమిషన్‌ సిఫార్సుల అమలు విషయంలో కేంద్ర ప్రభుత్వం తన వైఖరి స్పష్టం చేయాలని జాతీయ ఓబీసీ మహా సభ నాయకులు డిమాండ్‌ చేశారు. మండల్‌ కమిషన్‌ సిఫార్సుల అమలు, బీసీ కుల గణన తదితర డిమాండ్లపై జాతీయ ఓబీసీ మహాసభ, తెలంగాణ, ఆంధ్రప్రదేశ్‌ బీసీ సంఘాల ఆధ్వర్యంలో దిల్లీలో ఆదివారం సమావేశం నిర్వహించారు. ఇందులో మహాసభ అధ్యక్షుడు ప్రొఫెసర్‌ బభన్‌రావ్‌ తైవాడే తదితర నాయకులు మాట్లాడుతూ బీసీ కుల గణన, చట్టసభల్లో బీసీలకు రిజర్వేషన్లు, జనాభా దామాషా ప్రాతిపదికన బీసీ, ఎస్సీ, ఎస్టీలకు రిజర్వేషన్లపై పలు రాష్ట్రాల శాసనసభలు తీర్మానాలు చేసి పంపినా కేంద్ర ప్రభుత్వంలో చలనం కనిపించడం లేదని ఆవేదన వ్యక్తం చేశారు. దీనిపై కేంద్రం దృష్టి సారించకపోతే రైతుల్లానే ఉద్యమిస్తామన్నారు. ఈ సమావేశంలో తెలంగాణ, ఆంధ్రప్రదేశ్‌ బీసీ సంఘాల అధ్యక్షుడు జాజుల శ్రీనివాస్‌గౌడ్‌, కేశన శంకరరావు తదితరులు పాల్గొన్నారు.