Thailand - Eluru: పందెంకోడిని కొనడానికి.. థాయిలాండ్‌ నుంచి వచ్చి..

రూ.3 లక్షలకు కొనుక్కెళ్లిన విదేశీయులు

లింగపాలెం, న్యూస్‌టుడే: సామాజిక మాధ్యమాల్లో వీడియో చూసి, పందెం కోడిని కొనేందుకు థాయిలాండ్‌ నుంచి నలుగురు యువతీయువకులు ఇటీవల ఏలూరు జిల్లా లింగపాలెం మండలం రంగాపురానికి వచ్చారు. గ్రామంలో నాటు కోళ్ల ఫారం నిర్వహిస్తున్న కూరాకుల రత్తయ్య తెలిపిన వివరాల మేరకు.. ఈ ఏడాది భోగి పండుగ రోజున ఆయన తన పుంజుతో పశ్చిమగోదావరి జిల్లా గణపవరంలో రూ.27 లక్షల కోడి పందెం వేయగా, అది గెలిచింది. ఆ వీడియో సామాజిక మాధ్యమాల్లో వైరలయింది. దాన్ని చూసిన థాయిలాండ్‌కు చెందిన ఇద్దరు యువకులు, ఇద్దరు యువతులు ఆ పుంజును కొనడానికి బుధవారం రంగాపురానికి వచ్చారు. విక్రయించడానికి రత్తయ్య నిరాకరించడంతో దాంతో ఫొటో దిగి, మరో పుంజును రూ.3 లక్షలకు కొనుక్కుని పట్టుకెళ్లారు.