మాజీ సీఎం కిరణ్‌కుమార్‌రెడ్డికి హైకోర్టులో ఊరట

ఈనాడు, అమరావతి: మాజీ ముఖ్యమంత్రి, రాజంపేట భాజపా ఎంపీ అభ్యర్థి నల్లారి కిరణ్‌కుమార్‌రెడ్డికి హైకోర్టులో ఊరట లభించింది. చిత్తూరు జిల్లా రొంపిచర్ల పోలీసులు ఆయనపై నమోదు చేసిన కేసులో తదుపరి చర్యలన్నింటినీ నిలిపివేస్తూ.. హైకోర్టు న్యాయమూర్తి జస్టిస్‌ కె.శ్రీనివాసరెడ్డి మంగళవారం ఉత్తర్వులు జారీచేశారు. ఎన్నికల అధికారుల నుంచి ముందస్తు అనుమతి తీసుకోకుండా కిరణ్‌కుమార్‌రెడ్డి ఈనెల 7న చిత్తూరు జిల్లా రొంపిచర్ల బస్టాండ్‌ ప్రాంతంలో సమావేశం నిర్వహించారంటూ.. ఎంపీడీవో కె.రెడ్డెప్ప ఇచ్చిన ఫిర్యాదు ఆధారంగా పోలీసులు కేసు నమోదు చేశారు. తనపై నమోదైన కేసును కొట్టేయాలని కిరణ్‌కుమార్‌రెడ్డి హైకోర్టులో వ్యాజ్యం వేశారు. పిటిషనర్‌ తరఫున న్యాయవాది ఎన్వీ సుమంత్‌ వాదనలు వినిపించారు.