కార్యాలయాల్లో మహిళల హవా

35% పెరిగిన నియామకాలు
ఐటీఈఎస్‌, బీపీఎం రంగాల్లో ఎక్కువ

ముంబయి: కార్యాలయాల్లో మహిళల హవా పెరుగుతోంది. గతేడాది ఫిబ్రవరితో పోలిస్తే గత నెలలో అతివలకు ఉద్యోగావకాశాలు 35% పెరిగాయని ఫౌండిట్‌ అనే నియామక వెబ్‌సైట్‌ తెలిపింది. దేశంలోని కార్యాలయ (వైట్‌ కాలర్‌) ఆర్థిక వ్యవస్థలో మహిళా సిబ్బందికి గిరాకీ పెరుగుతోందని ఈ సంస్థ విడుదల చేసిన గణాంకాలను బట్టి తెలుస్తోంది. దీని ప్రకారం..

* ఐటీ ఆధారిత సేవలు (ఐటీఈఎస్‌), బిజినెస్‌ ప్రాసెస్‌ మేనేజ్‌మెంట్‌ (బీపీఎం) రంగం అత్యధికంగా 36% అవకాశాలను మహిళలకు ఇచ్చింది.  

* ఐటీ/కంప్యూటర్స్‌; బ్యాంకింగ్‌, అకౌంటింగ్‌, ఆర్థిక సేవలు; నియామకాలు, స్టాఫింగ్‌; ఆతిథ్యం, ఆరోగ్యసంరక్షణ, డయాగ్నొస్టిక్స్‌ రంగాలు ఆ తర్వాతి స్థానాల్లో ఉన్నాయి.

* మహిళలకు అధికంగా ఉద్యోగావకాశాలిచ్చే నగరాల్లో దిల్లీ ఎన్‌సీఆర్‌ (21%), ముంబయి (15%), బెంగళూరు (10%), చెన్నై (9%), పుణె (7%) ముందున్నాయి.

* ఏదో ఒక కారణంతో వృత్తికి విరామం ఇచ్చి, తిరిగి పనిలో చేరిన వారి సంఖ్య మొత్తం మహిళా ఉద్యోగుల్లో 6 శాతంగా ఉంది. తమ ఇష్టప్రకారం ఉద్యోగం (ఫ్రీలాన్స్‌) చేసే వారి సంఖ్య 4 శాతంగా ఉంటోంది. అంటే వైట్‌ కాలర్‌ ఆర్థిక వ్యవస్థలో తాత్కాలిక అవకాశాలు (గిగ్‌ వర్క్‌) పెరుగుతున్నాయి.

* అనుభవం పరంగా చూస్తే నాయకత్వ స్థాయిలో 8% మంది మహిళలున్నారు. ఇది గతేడాది 6 శాతమే. మధ్య స్థాయి హోదాల్లో 24% మంది ఉండగా.. తక్కువ స్థాయి (1-3 ఏళ్ల అనుభవం) హోదాల్లో 18% మంది కనిపించారు.

నాయకత్వ అవకాశాలు కోల్పోతున్నారు!

8-15 ఏళ్ల అనుభవం ఉండీ.. నాయకత్వ హోదా పొందే అవకాశాలను కోల్పోతున్నట్లు 50 శాతం మంది మహిళలు అభిప్రాయపడ్డారు. సొంతంగా పరిమితులు విధించుకోవడమే ఇందుకు కారణమని తెలుస్తోంది. ఆఫీసులో, బయటా పలు సవాళ్లు ఎదురవ్వడమే ఇందుకు కారణమని ఓ సర్వే అంటోంది. దీంతో ప్రారంభ- మధ్య స్థాయి హోదాలతో పోలిస్తే సీనియర్‌ మేనేజ్‌మెంట్‌ స్థాయిలో మహిళల సంఖ్య అతి తక్కువగా ఉంటోంది.