Union Budget 2023: గరిటె తిప్పిన నిర్మలమ్మ.. సందడిగా ‘హల్వా’ వేడుక..!

దిల్లీ: కేంద్ర బడ్జెట్‌(Union Budget 2023-24)కు ముందు సంప్రదాయం ప్రకారం నిర్వహించే 'హల్వా వేడుక(Halwa Ceremony)’ కేంద్ర ఆర్థిక శాఖ కార్యాలయంలో సందడిగా సాగింది. ఈ కార్యక్రమానికి కేంద్ర ఆర్థిక శాఖ మంత్రి నిర్మలా సీతారామన్‌(Nirmala Sitharaman) హాజరై.. హల్వా గరిటె తిప్పారు. అనంతరం.. అధికారులకు, సిబ్బందికి హల్వాను స్వయంగా అందజేశారు. ఈ కార్యక్రమంలో భాగంగా ఆర్థిక మంత్రి ఇక్కడి బడ్జెట్ ప్రెస్‌లో పర్యటించారు. సంబంధిత అధికారులకు శుభాకాంక్షలు తెలియజేయడంతోపాటు సన్నాహాలను సమీక్షించారు.

బడ్జెట్ పత్రాల ముద్రణకు ముందు హల్వా కార్యక్రమం నిర్వహించడం ఆనవాయితీ. అయితే, కొవిడ్‌ కారణంగా గతేడాది ఈ కార్యక్రమం నిర్వహించలేదు. ఇదిలా ఉండగా.. గత రెండు బడ్జెట్‌లను ముద్రణ లేకుండా కాగితరహితంగానే ప్రవేశపెట్టారు. ఈసారి కూడా కాగితరహితంగా డిజిటల్‌ పద్ధతిలో 2023-24 బడ్జెట్‌ను ఫిబ్రవరి 1న నిర్మలా సీతారామన్‌ పార్లమెంటులో ప్రవేశపెట్టనున్నారు. ఆర్థిక మంత్రిగా నిర్మలా సీతారామన్‌ బడ్జెట్‌ను ప్రవేశపెట్టనుండటం ఇది ఐదోసారి. వచ్చే ఏడాది సార్వత్రిక ఎన్నికలు జరగనున్న నేపథ్యంలో ఈ బడ్జెట్‌ ప్రధాని నరేంద్ర మోదీ సర్కార్‌కు చివరి పూర్తిస్థాయి బడ్జెట్ కానుంది.