HDFC Bank: హెచ్‌డీఎఫ్‌సీ బ్యాంకు రుణాలు 1.6 శాతం వృద్ధి

దిల్లీ: దేశంలోని అతిపెద్ద ప్రైవేట్‌ రంగ హెచ్‌డీఎఫ్‌సీ బ్యాంక్ లిమిటెడ్‌ 2023-24 ఆర్థిక సంవత్సరం జనవరి-మార్చి త్రైమాసికంలో తన రుణాల్లో 1.60% వృద్ధిని నమోదు చేసింది. డిపాజిట్లు 7.50 శాతం పెరిగాయి. దేశీయ రిటైల్‌ రుణాలు.. గతేడాదితో పోలిస్తే 108.90 శాతం పెరిగాయని బ్యాంకు స్టాక్‌ ఎక్స్చేంజ్‌ ఫైలింగ్‌లో తెలిపింది. వాణిజ్య, గ్రామీణ బ్యాంకింగ్‌ రుణాలు గతేడాదితో పోలిస్తే 24.60 శాతం పెరిగాయి. గత త్రైమాసికంతో పోలిస్తే బ్యాంకు రిటైల్‌ డిపాజిట్లు 6.90 శాతం, హోల్‌సేల్‌ డిపాజిట్లు దాదాపు 10.90 శాతం పెరిగాయి. బ్యాంకు CASA (కరెంట్‌ ఖాతా, సేవింగ్స్‌ ఖాతా) డిపాజిట్లు సుమారు రూ.9.09 లక్షల కోట్లకు చేరాయి. బ్యాంకుకు సంబంధించిన CASA నిష్పత్తి 2023 డిసెంబర్‌ 31 నాటికి 37.70 శాతంతో పోలిస్తే 2024, మార్చి 31 నాటికి దాదాపు 38.20 శాతంగా ఉంది.