సైబర్‌ దాడులు.. మనపై ఎక్కువే

ప్రపంచవ్యాప్తంగా మూడో స్థానంలో భారత్‌
గతేడాది 7.9 కోట్ల దాడులు
సామాజిక మాధ్యమాల్లో టెలిగ్రాంపై గురి

దిల్లీ: అమెరికా, బ్రిటన్‌ తర్వాత అంతర్జాతీయంగా ‘ఫిషింగ్‌’ దాడులను అత్యధికంగా ఎదుర్కొంటున్నది మన దేశమే. భారత దేశంపై జరిగిన సైబర్‌ దాడుల్లో 33% టెక్నాలజీ రంగంపైనే కనిపించాయని స్కేలర్‌ అనే సైబర్‌ భద్రతా సంస్థ తన నివేదికలో పేర్కొంది. గతేడాది కాలంగా అంతర్జాతీయ ఫిషింగ్‌ దాడులు 60% పెరిగాయని తెలిపింది. 2023 జనవరి-డిసెంబరులో కనిపించిన 200 కోట్ల బ్లాక్డ్‌ ఫిషింగ్‌ లావాదేవీల ఆధారంగా రూపొందిన ఈ నివేదిక ప్రకారం..

• భారత్‌లో టెక్‌ రంగం(33%) అన్ని రంగాల కంటే ఎక్కువగా సైబర్‌ దాడులకు గురైంది.
• ఆర్థిక, బీమా రంగాల్లోనూ 2022తో పోలిస్తే సైబర్‌ దాడులు 393% పెరిగాయి. ఈ రంగాలు డిజిటల్‌ ప్లాట్‌ఫారాలపై ఆధారపడడం అధికమవ్వడం, సైబర్‌నేరగాళ్లకు కలిసొస్తోంది.
• తయారీ రంగంలో 2022, 2023 మధ్య ఫిషింగ్‌ 31% పెరిగింది. ఏఐ సాంకేతికతను అందిపుచ్చుకుంటుండడంతో ఆయా రంగాలు దాడులకు ‘బలహీన లక్ష్యాలు’గా మారాయి.
• 2023లో ఫిషింగ్‌ దాడులకు అమెరికా ఎక్కువగా బలైంది. మొత్తం దాడుల్లో 55.9% ఈ దేశంపైనే జరగ్గా.. బ్రిటన్‌పై 5.6%, భారత్‌పై 3.9% (7.9 కోట్ల దాడులు) చోటు చేసుకున్నాయి.
• భారత్‌లో డిజిటల్‌ పర్సనల్‌ డేటా ప్రొటెక్షన్‌ యాక్ట్‌ అమలు వల్ల ఇటువంటి దాడులను నిలువరించడానికి సహకారం లభించినట్లయింది.
• 2023లో అత్యంతగా అనుకరించిన బ్రాండ్లలో మైక్రోసాఫ్ట్‌ కనిపించింది. ఆ తర్వాతి స్థానంలో అడోబ్‌, అమెజాన్‌, గూగుల్‌ ఉన్నాయి.
• ప్రపంచవ్యాప్తంగా ఎక్కువగా దాడుల బారినపడ్డ సామాజిక మాధ్యమాల్లో టెలిగ్రాం (7,92,883 ఫిషింగ్‌ దాడులు) ఉంది. ఆ తర్వాతి స్థానంలో ఫేస్‌బుక్‌ (5,32,243), వాట్సప్‌ (3,78,968) ఉన్నాయి.