Hyundai: క్రెటా, ఎక్స్‌టర్‌ దన్నుతో హ్యుందాయ్‌ విక్రయాల్లో 60% ఎస్‌యూవీలే!

దిల్లీ: ఈ ఏడాది హ్యుందాయ్‌ మోటార్‌ ఇండియా (Hyundai Motor India) దేశీయ విక్రయాల్లో ఎస్‌యూవీల వాటా తమ లక్ష్యానికి అనుగుణంగా 60 శాతానికి పైగానే ఉంటుందని కంపెనీ తెలిపింది. క్రెటా, కొత్తగా విడుదల చేసిన ఎక్స్‌టర్‌.. విక్రయాలు పుంజుకోవడానికి దోహదం చేసినట్లు సీఓఓ తరుణ్‌ గార్గ్‌ తెలిపారు. గత మూడు నెలలుగా ఎగుమతులు సైతం వేగం పుంజుకున్నట్లు వెల్లడించారు. దీంతో అంతర్జాతీయంగా భౌగోళిక రాజకీయ అనిశ్చితులు ఉన్నప్పటికీ.. విదేశీ సరఫరాలు గాడిన పడతాయని ఆశాభావం వ్యక్తం చేశారు.

2023 అక్టోబరులో హ్యుందాయ్‌ విక్రయాలు (Hyundai Motor India Sales) 18.5 శాతం పెరిగి 68,728 యూనిట్లకు చేరాయి. జనవరి- అక్టోబర్‌ మధ్య అమ్మకాలు వార్షిక ప్రాతిపదికన 11.5 శాతం పుంజుకొని 6,43,535 యూనిట్లకు ఎగబాకాయి. అదే సమయంలో దేశీయ మార్కెట్‌లో విక్రయాలు 9.49 శాతం పెరిగి 5,09,910 యూనిట్లకు చేరాయి. ఏడాది ఆరంభంలో కంపెనీ విక్రయాల్లో ఎస్‌యూవీల వాటా 53 శాతంగా ఉండిందని గార్గ్‌ తెలిపారు. అయితే, క్రెటా విక్రయాలు పుంజుకోవటం కలిసొచ్చిందని వివరించారు. ఎక్స్‌టర్‌ అమ్మకాలూ బాగున్నాయని తెలిపారు.

కంపెనీ ఎగుమతులు సైతం తమ లక్ష్యమైన 1.6 లక్షల యూనిట్లు దాటుతాయని గార్గ్‌ ధీమా వ్యక్తం చేశారు. గత కొన్ని నెలలుగా విదేశీ సరఫరాలు పుంజుకున్నాయని తెలిపారు. జులై నుంచి ప్రతినెలా తమ తయారీ సామర్థ్యాన్ని 4,000 యూనిట్ల చొప్పున పెంచుతున్నామని వెల్లడించారు. ఫలితంగానే ఇటు దేశీయ విక్రయాలతో పాటు అటు ఎగుమతులను కూడా బ్యాలెన్స్‌ చేయగలుగుతున్నామని పేర్కొన్నారు. అయితే, ఇజ్రాయెల్‌ యుద్ధం కారణంగా భౌగోళిక రాజకీయ అనిశ్చితులు తమని ఆందోళనకు గురి చేస్తున్నాయని తెలిపారు.