నేలను తాకిన విమానం తోక భాగం.. 5 రోజుల్లో రెండో ఘటన

ముంబయి: ఇండిగో (IndiGo) ఎయిర్‌లైన్స్‌కు చెందిన విమానం ఒకటి ల్యాండ్‌ అవుతుండగా.. ప్రమాదవశాత్తూ తోక భాగం రన్‌వేను తాకింది. అహ్మదాబాద్‌ ఎయిర్‌పోర్ట్‌లో (Ahmedabad airport) గురువారం ఈ ఘటన చోటుచేసుకుంది. దీనిపై డీజీసీఏ (DGCA) విచారణకు ఆదేశించింది. గడిచిన ఐదు రోజుల్లో ఇది రెండో ఘటన. రెండుసార్లూ ఇండిగోకు చెందిన విమానాలే టెయిల్‌ స్ట్రైక్‌కు గురికావడం గమనార్హం.

బెంగళూరు నుంచి అహ్మదాబాద్‌ వెళుతున్న ఇండిగో 6E6595 విమానం తోక భాగం ల్యాండింగ్‌ సమయంలో రన్‌వేను తాకింది. దీంతో విమానాన్ని నిలిపివేసి మరమ్మతులు చేపట్టారు. ఈ ఘటనపై డీజీసీఏ విచారణకు ఆదేశించింది. ప్రమాద సమయంలో పైలట్లుగా ఉన్న వారిని విధులను నుంచి తాత్కాలికంగా తప్పించింది. ఇండిగో సైతం ఈ విషయాన్ని ధ్రువీకరించింది. ప్రస్తుతం విచారణ కొనసాగుతోందని తెలిపింది.

అంతకుముందు జూన్‌ 11న సైతం కోల్‌కతా నుంచి వచ్చిన ఇండిగోకు చెందిన విమానం దిల్లీ విమానాశ్రయంలో ల్యాండ్‌ అవుతుండగా.. తోక భాగం రన్‌వే నేలను తాకింది. అయితే, విమానం సురక్షితంగా దిగడంతో ప్రయాణికులు ఊపిరి పీల్చుకున్నారు. ఘటన కారణంగా విమానం వెనుకభాగం దెబ్బతింది. ఈ ఘటన రెండ్రోజులు ఆలస్యంగా వెలుగులోకి వచ్చింది. ఐదు రోజుల వ్యవధిలో ఈ రెండు సంఘటనలు చోటుచేసుకున్నాయి.