ఒకాయా ఇ-బైక్‌ డిస్‌రప్టర్‌

నిర్వహణ వ్యయం 25 పైసలు/కి.మీ.

దిల్లీ: దిల్లీకి చెందిన ఒకాయా సంస్థ ప్రీమియం బ్రాండ్‌ ఫెరాటో, సరికొత్త విద్యుత్‌ బైక్‌ ‘డిస్‌రప్టర్‌’ను విపణిలోకి విడుదల చేసింది. దీని ధర రూ.1,59,999. విద్యుత్‌ వాహన రాయితీల తర్వాత దిల్లీలో ఈ బైకు రూ.1.40 లక్షలకు లభించనుంది. ఈ బైకు నిర్వహణ వ్యయం కిలోమీటరుకు 25 పైసలేనని కంపెనీ చెబుతోంది. రాబోయే 90 రోజుల్లో బైక్‌ డెలివరీలు ప్రారంభిస్తామని వెల్లడించింది. ఒక్కసారి ఛార్జింగ్‌తో 129 కి.మీ. వరకు ప్రయాణించే వీలున్న ఈ బైక్‌ గరిష్ఠ వేగం గంటకు 95 కి.మీ. అని తెలిపింది. మూడేళ్లు/ 30,000 కి.మీ వారెంటీని కంపెనీ అందిస్తోంది. తొలి 1000 మంది వినియోగదారులు కంపెనీ వెబ్‌సైట్‌పై రూ.500 చెల్లించి ముందస్తు బుకింగ్‌ చేసుకోవచ్చు. ఆ తర్వాత ఈ మొత్తం రూ.2,500కు పెరగనుంది. టెలిస్కోపిక్‌ ఫ్రంట్‌ సస్పెన్షన్‌, డిజిటల్‌ హైబ్రిడ్‌ డిస్‌ప్లే, బ్లూటూత్‌, జీపీఎస్‌ అనుసంధానత వంటి అధునాతన ఫీచర్లు ఇందులో ఉన్నాయి.