Bisleri: బిస్లరీ విక్రయానికి బ్రేక్‌.. విక్రయించడం లేదన్న రమేశ్‌ చౌహాన్‌

దిల్లీ: ప్రముఖ ప్యాకేజ్డ్‌ వాటర్‌ వ్యాపార సంస్థ బిస్లరీని (Bisleri) ఎవరికీ విక్రయించడం లేదని ప్రముఖ వ్యాపార వేత్త, సంస్థ ఛైర్మన్‌ రమేశ్‌ చౌహాన్‌ వెల్లడించారు. ప్రస్తుతం ఏ పార్టీతోనూ చర్చలు జరపడం లేదని స్పష్టం చేశారు. బిస్లరీ కొనుగోలుపై చర్చలు నిలిపివేసినట్లు టాటా (Tata) కన్జూమర్‌ ప్రొడక్ట్స్‌ లిమిటెడ్‌ ప్రకటించిన మూడు రోజులకే ఆయన నుంచి ఈ ప్రకటన వెలువడడం గమనార్హం. అయితే, బిస్లరీ సంస్థను ఆయన కుమార్తె జయంతి చౌహాన్‌ నడిపిస్తారంటూ వచ్చిన మీడియా కథనాలపై స్పందించేందుకు నిరాకరించారు.

బిస్లరీ వాటర్‌ బాటిల్‌ వ్యాపారాన్ని విక్రయిస్తున్నట్లు చౌహాన్‌ గతేడాది నవంబర్‌లో వెల్లడించారు. 82 ఏళ్ల చౌహాన్‌ తదనంతరం ఆ వ్యాపారాన్ని చూసుకునేందుకు జయంతి ఆసక్తిగా లేకపోవడమే ఇందుకు కారణమని ఆయనే స్వయంగా వెల్లడించారు. ఈ క్రమంలోనే టాటా గ్రూప్‌ సహా మరికొన్ని సంస్థలు సైతం చర్చలు జరిపాయి. అయితే, బిస్లరీ కొనుగోలు విషయంలో చర్చలను నిలిపివేసినట్లు టాటా గ్రూప్‌ ఇటీవల ప్రకటించింది. దీనికి కొనసాగింపుగా చౌహాన్‌ నుంచీ ఈ ప్రకటన వెలువడడం గమనార్హం.

మూడు దశాబ్దాల క్రితం చౌహాన్‌ తమ సాఫ్ట్‌ డ్రింక్స్‌ వ్యాపారాన్ని  దిగ్గజ సంస్థ కోకా-కోలాకు విక్రయించారు. థమ్సప్‌, గోల్డ్‌ స్పాట్‌, సిట్రా, మాజా, లిమ్‌కా బ్రాండ్లను 1993లో కోకా-కోలాకు బదిలీ చేశారు. ఇందులో థమ్సప్‌ ఇప్పటికే బిలియన్‌ డాలర్‌ బ్రాండ్‌గా అవతరించింది. మరోవైపు ఎఫ్ఎంసీజీ వ్యాపారంపై దృష్టి సారించిన టాటా గ్రూప్‌ ఇటీవల ఈ రంగంలోని పలు బ్రాండ్లను కొనుగోలు చేసింది. ఇప్పటికే ‘హిమాలయన్‌’ బ్రాండ్‌ పేరిట ప్యాకేజ్డ్‌ వాటర్‌ రంగంలో టాటా కన్జ్యూమర్‌ ఉంది. మరోవైపు టాటా కాపర్‌ ప్లస్‌, టాటా గ్లూకో పేరుతో హైడ్రేషన్‌ సెగ్మెంట్‌లోకీ ప్రవేశించింది.