Maruti Suzuki: ₹1.25 లక్షల కోట్ల క్యాపెక్స్‌.. 10 కొత్త మోడళ్లు.. 2031 నాటికి మారుతీ సుజుకీ ప్లాన్స్‌!

దిల్లీ: మారుతీ సుజుకీ ఇండియా (Maruti Suzuki India) మూలధన వ్యయం 2030-31 నాటికి దాదాపు రూ.1.25 లక్షల కోట్ల దాకా ఉంటుందని కంపెనీ రెగ్యులేటరీ ఫైలింగ్‌లో పేర్కొంది. ప్రస్తుతం ఉన్న 17 మోడళ్లను 28 వరకు విస్తరిస్తామని వెల్లడించింది. వార్షిక తయారీ సామర్థ్యాన్ని 40 లక్షల యూనిట్లకు పెంచుతామని తెలిపింది.

మరో 20 లక్షల యూనిట్ల తయారీ సామర్థ్యాన్ని ఏర్పాటు చేయడం కోసం రూ.45 వేల కోట్లు అవసరమని మారుతీ సుజుకీ (Maruti Suzuki India) తెలిపింది. ప్రస్తుత ధరలకు స్వల్పంగా ద్రవ్యోల్బణాన్ని కలిపి ఈ అంచనాకు వచ్చినట్లు పేర్కొంది. విక్రయాలు, సేవలు, విడిభాగాల మౌలికవసతుల ఏర్పాటుకు నిధులు అవసరమని తెలిపింది. అలాగే ‘ఇంటర్నల్‌ కంబషన్‌ ఇంజిన్‌ (ICE)’ కార్లపై కొనసాగుతున్న పరిశోధనలకూ మూలధనం కావాల్సి ఉందని పేర్కొంది. వివిధ ఇంధన ఆప్షన్లతో 10-11 కొత్త మోడళ్లనూ అభివృద్ధి చేయాల్సిన అవసరం ఉందంది. వీటితో పాటు విద్యుత్‌ వాహనాలు, ఎస్‌యూవీల తయారీకీ పెద్ద ఎత్తున మూలధన వ్యయం అవసరమని కంపెనీ తెలిపింది.