‘చంద్రబాబు కృషితో రూ.14 లక్షల ప్యాకేజీ ఉద్యోగం’

సర్టిఫికెట్‌ చూపుతున్న పోలూరు మాధవ

రామగిరి, న్యూస్‌టుడే: మాజీ ముఖ్యమంత్రి చంద్రబాబునాయుడు కృషితో లక్షలాది మంది విద్యార్థులకు నేడు ఐటీ ఉద్యోగాలు లభించాయని స్కిల్‌ డెవలప్‌మెంట్‌లో శిక్షణపొంది ఐటీ ఉద్యోగం చేస్తున్న పోలూరు మాధవ నాయుడు పేర్కొన్నాడు. రాప్తాడు నియోజకవర్గం రామగిరి మండలం దుబ్బార్లపల్లికి చెందిన రైతు రంగనాయకులు కుమారుడైన ఈ యువకుడు అనంతపురం నగరంలోని అనంతలక్ష్మి ఇంజినీరింగ్‌ కళాశాలలో 2015-2018లో బీటెక్‌ చదువుతున్న సమయంలో స్కిల్‌ డెవలప్‌మెంట్‌ ద్వారా అక్కడే శిక్షణ పొందినట్లు తెలిపాడు. బీటెక్‌ పూర్తియిన తరువాత స్కిల్‌ డెవలప్‌మెంట్‌ సర్టిఫికెట్‌తో ఉద్యోగంలో చేరినట్లు పేర్కొన్నాడు. ప్రస్తుతం బెంగళూరులోని ప్రముఖ కంపెనీలో తనకు ఏడాదికి రూ.14 లక్షల వేతనం వస్తోందని చెప్పాడు. ఐటీ అభివృద్ధితో పాటు, విద్యార్థులకు ప్రత్యేక శిక్షణ అందించడంతో సులభంగా ఉద్యోగాలు లభించడంతో తనలాగే ఎంతోమంది విద్యార్థులు లబ్ధి పొందారన్నాడు. ఇలాంటి కార్యక్రమంలో చంద్రబాబునాయుడు అవినీతికి పాల్పడ్డారంటూ అక్రమంగా అరెస్టు చేయడం దారుణమన్నాడు. చంద్రబాబుకు ఐటీ ఉద్యోగులతోపాటు పెద్దఎత్తున ప్రజలు అండగా నిలుస్తున్నారని తెలిపాడు. తామంతా చంద్రబాబుతోనే ఉంటామని వివరించాడు.