పవన్‌ గెలుపు.. పిఠాపురం అభివృద్ధికి మలుపు

జనసేన రాష్ట్ర ప్రధాన కార్యదర్శి నాగబాబు
గొల్లప్రోలులో భారీ ప్రచార ర్యాలీ

గొల్లప్రోలులో ప్రచారం సాగిస్తున్న నాగబాబు, వర్మ, కృష్ణంరాజు

గొల్లప్రోలు: పవన్‌ కల్యాణ్‌ను గెలిపించడం ద్వారా పిఠాపురం అభివృద్ధికి బాటలు వేయాలని జనసేన రాష్ట్ర ప్రధాన కార్యదర్శి నాగబాబు కోరారు. ఈ సార్వత్రిక ఎన్నికల బరిలో పిఠాపురం అసెంబ్లీ అభ్యర్థిగా పవన్‌ కల్యాణ్‌, కాకినాడ ఎంపీ అభ్యర్థిగా తంగెళ్ల ఉదయ్‌ శ్రీనివాస్‌ ఉన్నారని.. వారిని అఖండ మెజారిటీతో గెలిపించాలని ఓటర్లను కోరారు. బుధవారం గొల్లప్రోలులో భారీ ప్రచార ర్యాలీ నిర్వహించారు. మాజీ ఎమ్మెల్యే ఎస్‌వీఎస్‌ఎన్‌ వర్మ, భాజపా నియోజకవర్గ ఇన్‌ఛార్జ్‌ కృష్ణంరాజు తదితరులు ర్యాలీలో పాల్గొన్నారు. స్థానిక ఆర్టీసీˆ బస్టాండు నుంచి ప్రారంభమైన మోటారుసైకిళ్లతో కూడిన ఈ ర్యాలీలో అన్ని వీధులగుండా సాగింది. మహిళలు నాగబాబుకు హారతులిచ్చారు. కడారి తమ్మయ్యనాయుడు, గుండ్ర సుబ్బారావు, శీరం మాణిక్యం తదితరులు పాల్గొన్నారు. గొల్లప్రోలు మండలం వన్నెపూడిలో జరిగిన శ్రీరామనవమి వేడుకల్లో నాగబాబు పాల్గొన్నారు. సీతారాముల కల్యాణోత్సవాన్ని వీక్షించి, స్వామి, అమ్మవార్లను దర్శించుకున్నారు.