వస్తున్నారు.. వెళ్తున్నారు!

వీఎంఆర్‌డీఏ కార్యదర్శి వేణుగోపాల్‌ ఆకస్మిక బదిలీ

ఈనాడు, విశాఖపట్నం: విశాఖ మహాప్రాంత అభివృద్ధి సంస్థ (వీఎంఆర్‌డీఏ) కార్యదర్శిగా విధులకు డిప్యుటేషన్‌పై వచ్చిన అధికారులు ఎక్కువ కాలం ఉండడం లేదు. కొద్ది నెలల్లోనే వెనక్కి వెళ్లిపోతున్నారు. మూడేళ్లుగా ఇదే పరిస్థితి. గతంలో వచ్చిన రఘునాథ రెడ్డి ఎక్కువకాలం ఉండ లేదు. తాజాగా టి.వేణుగోపాల్‌ది అదే పరిస్థితి. భూపరిపాలనశాఖ నుంచి డిప్యుటేషన్‌ మీద వచ్చిన ఆయన ఆకస్మిక బదిలీ వీఎంఆర్‌డీఏలో తీవ్ర చర్చనీయాంశమైంది. బదిలీ నిలుపుదలకు ఓ ఉన్నతాధికారి ప్రయత్నించినా ఆగలేదని, రాజకీయ ఒత్తిళ్లే కారణమని సమాచారం.

ఆ స్థల వ్యవహారమేనా?: కొద్ది రోజుల కిందట వీఎంఆర్‌డీఏ పరిధిలోని ఖాళీ స్థలాలకు వేలం నిర్వహించారు. అదే క్రమంలో గతంలో వేలంలో దక్కించుకొని డబ్బులు చెల్లించకుండా అనుభవిస్తున్న వాటిని స్వాధీనం చేసుకున్నారు. అలా అధికార పార్టీలోని ఓ  ముఖ్యనేత అనుచరుడికి నోటీసులు వెళ్లాయి. అప్పట్లో  ఆ స్థలం వద్ద వివాదమూ చోటుచేసుకుంది. దీంతో అధికారి బదిలీకి ఒత్తిడి తెచ్చినట్లు తెలుస్తోంది. వేణుగోపాలరావు భూపరిపాలనశాఖ నుంచి వీఎంఆర్‌డీఏకు నాలుగు నెలల క్రితం వచ్చారు. కొద్ది రోజుల్లోనే రెవెన్యూ వచ్చేలా కొన్ని ప్రణాళికలు అమలు చేశారు.

* పాత ప్లాట్ల విక్రయం, వాణిజ్య సముదాయాల నుంచి రావాల్సిన బకాయిల వసూలుపై దృష్టిసారించారు. దుకాణదారులకు నోటీసులు ఇచ్చి బకాయిలు వసూలు చేశారు. లేదంటే ఖాళీ చేయాల్సిందేనని స్పష్టం చేశారు. అలా మొత్తంగా గత మూడు నెలల్లో రూ.70 కోట్ల ఆదాయం వచ్చింది. ఏళ్లుగా దాకమర్రి లేఅవుట్‌లో ఎల్‌ఐజీ ప్లాట్ల కేటాయింపు జరగలేదు. కలెక్టర్‌ సహకారంతో అదీ పూర్తి చేశారు. ఎంఐజీ ప్లాట్ల వేలం,  ఖాళీ స్థలాల విక్రయాలపై ఈ-కొనుగోలుకు వరసగా ప్రకటనలు ఇచ్చి తక్కువ సమయంలో ఎక్కువసార్లు వేలం నిర్వహించి ఆదాయం తీసుకొచ్చారు.