వెంటాడిన విధి: ఒకే చోట నాడు తల్లి.. నేడు తనయుడు..

శంషాబాద్‌, న్యూస్‌టుడే: ఒకే ప్రాంతంలో జాతీయ రహదారిపై నాడు తల్లి.. నేడు తనయుడు  ప్రాణాలు కోల్పోయారు. ఈ హృదయ విదారక ఘటన శంషాబాద్‌ మున్సిపల్‌ పరిధిలో మంగళవారం చోటుచేసుకుంది. శంషాబాద్‌ పోలీసులు, స్థానికుల కథనం ప్రకారం తొండుపల్లికి చెందిన రాచమల్ల చంద్రయ్య- పద్మమ్మ దంపతులకు నలుగురు సంతానం. చంద్రయ్య గతంలో అనారోగ్యంతో మృతిచెందాడు. పద్మమ్మ రెండేళ్ల క్రితం తొండుపల్లి వద్ద బెంగళూర్‌ జాతీయ రహదారిని దాటుతుండగా గుర్తు తెలియని వాహనం ఢీకొనడంతో మృతి చెందింది. ఆమె మూడో కుమారుడు కుమార్‌(35) డీసీఎం డ్రైవర్‌. పనులు ముగించుకుని నడుచుకుంటూ ఇంటికి బయలుదేరాడు. తల్లి చనిపోయిన ప్రాంతంలోనే రోడ్డు దాటుతుండగా గుర్తు తెలియని వాహనం ఢీకొనడంతో కుమార్‌ అక్కడికక్కడే మృతి చెందాడు. మృతుడికి భార్య లక్ష్మి, పదేళ్లలోపు ఇద్దరు పిల్లలున్నారు. కేసు నమోదుచేసి దర్యాప్తు చేస్తున్నట్లు తెలిపారు.