అర్ధరాత్రి రెస్టారంట్‌ సిబ్బందితో ఘర్షణ.. ఐఏఎస్‌, ఐపీఎస్‌పై వేటు

అజ్మీర్‌: అర్ధరాత్రి వేళ రెస్టారంట్(Rajasthan Eatery) సిబ్బందితో ఘర్షణకు దిగిన ఘటనలో ఇద్దరు ఐఏఎస్‌(IAS), ఐపీఎస్‌(IPS) అధికారులపై రాజస్థాన్‌(Rajasthan) ప్రభుత్వం చర్యలు తీసుకుంది. వారితో పాటు మరికొంతమంది సిబ్బందిపైనా సస్పెన్షన్ వేటు వేసింది. ఈ ఘటన దృశ్యాలు వైరల్ కావడం, ఈ వ్యవహారం ముఖ్యమంత్రి అశోక్‌ గహ్లోత్ దృష్టికి చేరడంతో ఈ చర్యలు అమలయ్యాయి. 

ఐఏఎస్‌ అధికారి గిరిధర్.. అజ్మీర్ డెవలప్‌మెంట్ అథారిటీ కమిషనర్‌గా ఉన్నారు. గంగాపుర్‌ సిటీ పోలీసు విభాగానికి ఐపీఎస్‌ అధికారి సుశీల్ కుమార్ బిష్ణోయ్..ఓఎస్‌డీగా నియమితులయ్యారు. ఈ కొత్త నియామకాన్ని పురస్కరించుకొని పార్టీ చేసుకునే క్రమంలోనే అధికారులకు, రెస్టారంట్ సిబ్బందికి మధ్య గొడవ జరిగింది. దీనిపై రెస్టారంట్‌ యజమాని మాట్లాడుతూ.. ‘ఆదివారం అర్ధరాత్రి దాటిన తర్వాత ఆ ఇద్దరు అధికారులు తమ స్నేహితులతో కలిసి రెస్టారంట్‌కు వచ్చారు. వారు వచ్చిన సమయంలో మా సిబ్బంది కొందరు నిద్రపోతున్నారు. దాంతో వారు మా సిబ్బందితో గొడవకు దిగారు. దీనిపై నాకు సమాచారం అందగానే.. స్థానిక పోలీసులకు ఫిర్యాదు చేశాను. ఆ తర్వాత ఐపీఎస్ అధికారి అక్కడి నుంచి వెళ్లిపోయారు. నా ఫిర్యాదు అందుకున్న పోలీసులు ఐపీఎస్‌ అధికారితో కలిసివచ్చారు. కర్రలు, ఇనుప రాడ్లతో మా వాళ్లపై దాడి చేశారు. ఈ ఘర్షణలో 11 మంది గాయపడ్డారు. వారిలో కొంతమందికి ఫ్రాక్చర్లు కూడా అయ్యాయి’ అని తెలిపారు.

ఈ ఘటన నేపథ్యంలో స్థానిక పోలీసులు గుర్తు తెలియని వ్యక్తులపై ఎఫ్‌ఐఆర్ నమోదు చేశారు. ఈ గొడవపై నిరసన వ్యక్తం కావడం, సీసీటీవీ దృశ్యాలు వైరల్ కావడంతో అజ్మీర్ ఎస్పీ సంబంధిత అధికారులను సస్పెండ్ చేశారు. ఐఏఎస్‌, ఐపీఎస్ అధికారులపైనా వేటు పడింది. 

అయితే సుశీల్ కుమార్ మాత్రం ఈ ఆరోపణలను ఖండించారు. ‘నేను ఆ ఘర్షణకు పాల్పడి ఉంటే.. గుర్తుతెలియని వ్యక్తులపై ఎందుకు కేసు నమోదు చేశారు. గొడవ గురించి తెలిసి, నా విధుల్లో భాగంగా అక్కడికి వెళ్లాను. మా సిబ్బందితో అక్కడికి వెళ్లేసరికి, రెండు వర్గాల మధ్య ఘర్షణ జరుగుతోంది. మేం వెళ్లి ఆ పరిస్థితులను ఓ కొలిక్కి తెచ్చాం’అని వెల్లడించారు. ప్రస్తుతం విజిలెన్స్ విభాగం ఈ ఘటనపై దర్యాప్తు చేస్తోంది.