Anand Mahindra: రోడ్డుపై సరిగమలు.. ఐడియా అద్భుతమన్న మహీంద్రా..!

ముంబయి: ప్రముఖ వ్యాపారవేత్త ఆనంద్‌ మహీంద్రా(Anand Mahindra) ఎప్పటికప్పుడు కొత్త విషయాలు వెల్లడిస్తుంటారు. తాజాగా ఆయన హంగరీ(Hungary)లోని మ్యూజికల్ రోడ్డు(musical road) గురించి నెటిజన్లకు పరిచయం చేశారు. అలాగే వినూత్న ఆలోచన గురించి కేంద్ర రోడ్డు రవాణా, జాతీయ రహదారుల మంత్రి నితిన్‌ గడ్కరీకి వెల్లడించారు. ఈ మేరకు ఆయన సోషల్ మీడియా వేదికగా వీడియోను షేర్ చేశారు. 

పాక్‌ ప్రియుణ్ని పెళ్లాడిన భారత మహిళ

‘ఈ ఆలోచన అద్భుతం.  మన జాతీయ రహదారులు కూడా ఇలా సంగీతం వినిపించేలా నితిన్‌ గడ్కరీ(Nitin Gadkari) చర్యలు తీసుకుంటారని నేను భావిస్తున్నారు. రహదారిపై ఒక వాహనం తగిన వేగంతో ప్రయాణిస్తుంటే.. ఏ పాట, ఏ సంగీతం వినిపించాలనేది ఎంచుకోవడమే ఇక్కడ కష్టమైన విషయం. అయితే అది రాష్ట్రాలను బట్టి మారుతుండొచ్చని నేను అనుకుంటున్నాను’ అని మహీంద్రా(Anand Mahindra) ఫన్నీగా రాసుకొచ్చారు. ఆ  వీడియోలో ఒక కారు సరైన వేగంతో వెళ్తుండగా.. వినసొంపైన సంగీతం వినిపిస్తోంది. ఈ వీడియోపై నెటిజన్లు కామెంట్ల వర్షం కురిపించారు. కొందరు సరదాగా పోస్టులు పెట్టగా..  ఈ పాటల కంటే మెరుగైన రోడ్లు, పాదాచారుల కోసం తగిన సదుపాయాలకు మొదట ప్రాధాన్యం ఇవ్వాలని మరికొందరు కోరారు.