Aham Brahmasmi: అందుకే ‘అహం బ్రహ్మస్మి’ని పక్కన పెట్టాం: దర్శకుడు శ్రీకాంత్‌

ఇంటర్నెట్‌ డెస్క్‌: మంచు మనోజ్‌ (Manchu Manoj) హీరోగా కొత్త దర్శకుడు శ్రీకాంత్‌ ఎన్‌.రెడ్డి కొన్నాళ్ల కిత్రం ‘అహం బ్రహ్మస్మి’ (Aham Brahmasmi) చిత్రాన్ని ప్రకటించారు. తర్వాత ఎలాంటి అప్‌డేట్‌ లేదు. ఆ ప్రాజెక్టును ఎందుకు పక్కన పెట్టాల్సి వచ్చిందో ‘లీలమ్మో’ సాంగ్‌ లాంచ్‌ ఈవెంట్‌ (Leelammo Song Launch Event)లో శ్రీకాంత్‌ తెలిపారు. వైష్ణవ్‌ తేజ్‌ (Vaishnav Tej), శ్రీలీల (Sreeleela) ప్రధాన పాత్రల్లో ఆయన తెరకెక్కించిన చిత్రం ‘ఆదికేశవ’ (Aadikeshava). ఈ సినిమా నవంబరు 10న ప్రేక్షకుల ముందుకు రానుంది. ప్రచారంలో భాగంగా హైదరాబాద్‌లో బుధవారం సాయంత్రం వేడుక నిర్వహించి ఆ గీతాన్ని విడుదల చేశారు. అనంతరం చిత్ర బృందం మీడియాతో ముచ్చటించింది. ఈ క్రమంలో ‘అహం బ్రహ్మస్మి’పై ఎదురైన ప్రశ్నకు దర్శకుడు సమాధానం ఇచ్చారు.

* తొలి సినిమాలో ఉన్నంత యాక్టివ్‌గా మీరు తర్వాతి చిత్రాల్లో కనిపించలేదు. ఈ సినిమాలో ఎలా ఉండబోతున్నారు?

వైష్ణవ్‌: ఏ దర్శకుడు ఎలా నటించమంటే అలా నేను నటిస్తా. అలా కాకుండా నన్ను నేను నిరూపించుకోవాలని పాత్ర పరిధి దాటి నటించను.

* మీ తొలి చిత్రం ‘ఉప్పెన’ అధిక వసూళ్లు సాధించింది. తర్వాత ఆ స్థాయి సినిమాలు రాకపోవడానికి కారణమేంటి?

వైష్ణవ్‌: సినిమా అంటే సమష్టి కృషి. దాని విజయం విషయంలో కథ ఒక్కటే కాదు..ప్రతిదీ పరిగణనలోకి వస్తుంది.

* మీరు డైరెక్ట్‌ చేసిన షార్ట్‌ఫిల్మ్స్‌లో కామెడీ మెండుగా ఉంటుంది. ఈ సినిమాలో ఆశించొచ్చా?

శ్రీకాంత్‌: తప్పకుండా. ఫస్టాఫ్‌ వినోదాత్మకంగా సాగుతుంది.

* మంచు మనోజ్‌ హీరోగా మీరు ప్రకటించిన ‘అహం బ్రహ్మస్మి’ సినిమాని పక్కన పెట్టడానికి కారణం?

శ్రీకాంత్‌: వ్యక్తిగత సమస్యల వల్ల మనోజ్‌ అన్న సినిమాలో నటించేందుకు కొంతకాలం వెయిట్‌ చేయాల్సి వచ్చింది. ఆలోగా నేను మరో చిత్రం పూర్తి చేసి వస్తానని ఆయనకు చెప్పా. పరస్పర అంగీకారంతోనే కొన్నాళ్లు దాన్ని పక్కన పెట్టాం. ఆ ప్రాజెక్టు తప్పకుండా ఉంటుంది.

* ‘ఆదికేశవ’ టైటిల్‌ ఆలోచన ఎవరిది?

శ్రీకాంత్‌: ఏ సినిమాకైనా ముందుగా చాలా పేర్లు అనుకుంటారు. చివరకు ఒకటి ఖరారు చేస్తారు. అలా మా టీమ్‌ అంతా కలిసి ‘ఆదికేశవ’ను ఫిక్స్‌ చేశాం. ఆ టైటిల్‌ ఎందుకు పెట్టామో రివీల్‌ అయిన సమయంలో ప్రేక్షకులు థ్రిల్‌ ఫీల్‌ అవుతారు.