అందుకే వర్మ-చిరు సినిమా ఆగింది..!

ఇంటర్నెట్‌ డెస్క్: ప్రముఖ దర్శకుడు రాంగోపాల్‌ వర్మ, అగ్రకథానాయకుడు చిరంజీవి.. వీరిద్దరి కాంబినేషనల్‌లో ఓ సినిమా వస్తే..? ఆ సర్‌ప్రైజే వేరప్పా. అయితే ఆ సర్‌ప్రైజ్‌ను తెలుగు ప్రేక్షకులకు అందించేందుకే ఆర్జీవీ.. చిరు కోసం ఓ కథ సిద్ధం చేశాడు. రెండు పాటలు కూడా చిత్రీకరించారు. కానీ, కొంతకాలం తర్వాత స్క్రిప్ట్‌ విషయంలో చిరుకి కాస్త సందేహం ఉండటంతో కొంతమేర మార్చాలన్నారట. కథ విషయంలో తాను అనుకున్నది తప్ప ఎవరు చెప్పినా ఆర్జీవీ వినడనే విషయం తెలిసిందే. ఈ విషయంలో ఆర్జీవీ రాజీపడకపోవడంతో మధ్యలోనే ఆ చిత్రం నిలిచిపోయింది. అప్పట్లో ఈ విషయంపై రకరకాల ఊహాగానాలు వినిపించాయి. ఇంతకీ ఆ సినిమా ఏంటంటే? ‘వినాలని ఉంది’. టబు కథానాయిక. ప్రముఖ నిర్మాత అశ్వనీదత్‌ నిర్మాతగా వ్యవహరించారు. ఈ క్రేజీ ప్రాజెక్టు ఆగిపోవడంతో.. ఈ చిత్రం కోసం స్వరపరిచిన గీతాల్ని దర్శకుడు గుణశేఖర్, చిరుతో తెరకెక్కించిన ‘చూడాలని ఉంది’ చిత్రంలో ఉపయోగించారు. ఇప్పటికీ ఆర్జీవీ- చిరు కాంబినేషన్‌లో చిత్రం రాలేదు. భవిష్యత్తులోనైనా వస్తుందేమో అని ఎదురుచూస్తున్నారు అభిమానులు.