వి.వి.వినాయక్‌ రూ.ఐదు లక్షల విరాళం

నిత్యావసర వస్తువులు కావాలంటే ఆయన్ని కలవండి

హైదరాబాద్‌: కరోనా విళయతాండవం చేస్తున్న తరుణంలో దాని నివారణ చర్యల్లో భాగంగా ఇప్పటికే పలు సినిమా షూటింగ్స్‌ను వాయిదా వేసిన విషయం తెలిసిందే. అయితే సినిమా షూటింగ్స్‌ వాయిదా పడడంతో సినీ పరిశ్రమపైనే ఆధారపడిన పలువురు పేద కళాకారులు ప్రస్తుతం కుటుంబపోషణ విషయంలో చాలా ఇబ్బంది పడుతున్నారు. దీంతో టాలీవుడ్‌ దర్శకుడు, నటుడు వి.వి.వినాయక్‌ పేద కళాకారులకు తన వంతు సాయం చేశారు. రూ.5 లక్షలను విరాళంగా ప్రకటించారు. ఈ మేరకు ఆయన రూ.ఐదు లక్షల చెక్కును కాదంబరి కిరణ్‌కు అందిస్తున్నట్లు తెలిపారు. నిత్యావసరాలు కావల్సిన పేద కళాకారులు ఆయన్ని సంప్రదించాలని వినాయక్‌ కోరారు.

‘అందరికీ నమస్కారం.. నేను మీ వి.వి వినాయక్‌. ప్రస్తుతం మనల్ని కరోనా వైరస్‌ వణికిస్తోంది. కానీ మనందరం ఇళ్లల్లో ఉండి ఆ మహమ్మారిని వణికించాలి. ప్రస్తుతం సినిమా షూటింగ్స్‌ లేకపోవడంతో పరిశ్రమలో ఉన్న పేద కళాకారులు, ఫైటర్స్‌, డ్యానర్స్ ఆర్థికంగా ఇబ్బందిపడుతున్నారు. కాబట్టి కుటుంబ పోషణకు అవసరమైన నిత్యావసరాలను కొని పేద కళాకారులకు అందించాలని కోరుకుంటూ నేను రూ.5 లక్షల చెక్కును కాదంబరి కిరణ్‌కి అందిస్తున్నాను. నిత్యావసర వస్తువులు అవసరం ఉన్న వారు ఆయన్ని కలిసి తీసుకోవాల్సిందిగా కోరుతున్నాను’ అని వి.వి.వినాయక్‌ తెలిపారు.